लन्डन (एजेन्सी)– रियल म्याड्रिडका स्टार इस्कोलाई सन् २०१३ मा भित्राउने मौका भएपनि म्यानचेस्टर युनाइटेडले अस्वीकार गरेको खुलासा भएको छ । इस्कोको टाउको आकारका कारण युनाइटेडले उनलाई लिन अस्वीकार गरेको बताइएको छ ।

युनाइटेडविरुद्ध मंगलबार भएको सुपर कप फाइनलमा रियलले २–१ को जित हासिल गर्दा इस्कोले नै निर्णायक गोल गरेका थिए । २०१३ मा इस्को रियलमा आबद्ध हुनुअघि भने युनाइटेडले उनलाई अस्वीकार गरेको हाइन ।

मार्काको समाचार अनुसार इस्कोले मालागामा उच्च प्रदर्शन गरिरहँदा युनाइटेड जाने सम्भावा बढेको थियो । इस्कोको प्रदर्शनबाट युनाइटेड प्रभावित भएपनि शरीरिकको दाँजोमा उनको टाउकोको आकार ठूलो भएकोले अस्वीकार गरेको बताइएको छ ।

होचा कदका इस्कोले प्रिमियर लिगको चुनौतिलाई आत्मसात गर्न कठिन हुने युरोपा लिग विजेताको बुझाई रहेको उल्लेख गरिएको छ । तर, यति बेला इस्को विश्वकै उत्कृष्ट एट्याकिङ मिडफिल्डरका रुपमा स्थापित भइसकेका छन् ।

जिनेदिन जिदानको टोलीमा अहिले २५ वर्षे खेलाडी महत्वपूर्ण सदस्य बन्न सफल भएका छन् । गेराथ बेलको सट्टा च्याम्पियन्स लिग फाइनलमा पनि इस्कोले मौका पाएका थिए । रियलका लागि १ सय ९० खेल खेलिसकेका इस्कोले तीन वटा च्याम्पियन्स लिग, एउटा ला लिगा र एउटा कोपा डेल रे उपाधि जितिसकेका छन् ।