म्यासेडोनिया (एजेन्सी)– म्यानचेस्टर युनाइटेडलाई विगतकै जस्तो सफलता दिलाउने बाटोमा प्रशिक्षक जोसे माउरिन्हो रहेको रियल म्याड्रिडका गेराथ बेलले बताएका छन् । माउरिन्होले यो सिजन बेललाई क्लबमा भित्राउन चाहेका थिए । सुपर कप फाइनलमा युनाइटेडलाई रियलले २–१ ले हराएपछि बेलले भने युनाइटेड च्याम्पियन्स लिगमा बलियो रुपमा प्रस्तुत हुने विश्वास व्यक्त गरे ।

रियलमा बेलको भविष्यका बारेमा शंकालाई चिर्ने क्रममा प्रशिक्षक जिनेदिन जिदानले बेललाई पहिलो रोजाइमा उतारेका थिए । रियलमा बेलको यो पाँचौ सिजन हो । युनाइटेड फेरी चुनौतिका रुपमा प्रस्तुत हुने विश्वास व्यक्त गर्ने क्रममा बेलले भने,‘मलाई लाग्छ उनीहरु चुनौति दिने अवस्थामा पुगेका छन् । त्यो माउरिन्होका कारण सम्भव भएको हा । उनले टोलीको मनोबल उच्च पारेका छन् ।’

पछिल्लो सिजनमा माउरिन्होले दिलाएको सफलताको चर्चा गर्दै बेलले थपे, ‘पछिल्लो बर्ष उनले केही उपाधि पनि जिते । मलाई लाग्छ युनाइटेड फेरी पुरानै अवस्थामा फर्कने क्रममा छ । युनाइटेडले चुनौति दिन नसक्ने कुनै कारण मैले देखेको छैन । उनीहरुसँग उत्कृष्ट प्रशिक्षक छन् ।’

माउरिन्होले फुटबलमा सबै चिज गरिसकेको उल्लेख गरे । ‘कसरी टोलीलाई तयार पार्नु पर्दछ र कसरी सफलता प्राप्त गर्न सकिन्छ भन्ने उनलाई राम्ररी थाहा छ’ बेलले भने, ‘उनीहरुले राम्रो गरिरहेका छन् । हामीलाई खेलमा उनीहरुले समस्या दिएका थिए । मलाई विश्वास छ युनाइटेडले यो सिजन उच्च प्रदर्शन गर्नेछ ।’