डर्टमुण्ड (एजेन्सी) – जर्मन क्लब बोरुसिया डर्टमुण्डले फ्रान्सेली युवा फरवार्ड ओस्मान डेम्बेलेलाई कुनै क्लबले खरिद गर्न चाहे १ सय ५० मिलियन युरो तिर्नुपर्ने जनाएको छ। स्पेनिस क्लब बार्सिलोनाले नेयमारको प्रस्थानपछि उनलाई भित्र्याउने क्लबको मुख्य लक्ष्य रहेको बुझिएको छ।

नेयमार विश्व कीर्तिमानी रकम गएपछि उक्त रकमको सदुपयोग गर्दै रिक्त रहेको स्थानको पदपूर्ति गर्न बार्सिलोनालाई ठुलो दबाब रहेको छ। जर्मनीका मिडियाका अनुसार डेम्बेले आफु बार्सिलोना जान इच्छुक भएतापनि क्लबले उनलाई कुनै हालतमा नबेच्ने जनाएको छ। नयाँ प्रशिक्षकसँगै डर्टमुण्डले यस सिजन नयाँ सुरुवात लिएकाले हाललाई कुनै खेलाडी नबेच्ने बताउँदै आएको हो।

गत सिजन मात्र जर्मनी छिरेका डेम्बेलेले डर्टमुण्डका लागि ४९ खेलमा १० गोल गरेका थिए। उनलाई भित्र्याउन डर्टमुण्डले अन्य ठुला युरोपियन क्लबलाई पछि पारेको थियो। डेम्बेलेलाई १३ मिलियन पाउण्ड तिरेको डर्टमुण्डले गत सिजन डीएफबी पोकाल कप जितेको थियो।

सन् २०१५को नोभेम्बरमा रेन्नेसको सिनियर टोलीका लागि डेब्यु गरेका डेम्बेलेले त्यस सिजन २७ खेलमा १२ गोल गरेपछि ठुला क्लबको ध्यान खिचेका थिए। उनले त्यस सिजन फ्रान्सको लिग वनको उत्कृष्ट युवा खेलाडीको उपाधि पनि जितेका थिए।