बार्सिलोना (एजेन्सी) – इङ्गलिस प्रिमियर लिगको क्लब लिभरपुलले मिडफिल्डर फिलिप कौटिन्होका लागि स्पेनिस क्लब बार्सिलोनाले गरेको १ सय मिलियन युरोको प्रस्ताव अस्विकार गरेको छ। बार्सिलोनाले प्रस्ताव राखेको छोटो समयमै लिभरपुलले उक्त प्रस्ताव अस्विकार गरेको हो।

प्रस्तावका अनुसार ८५ मिलियन युरो ट्रान्सफरमा दिने र बाँकी १५ मिलियन कौटिन्होका प्रदर्शनका आधारमा बोनसमा दिइने जनाइएको थियो। यसअघि पनि बार्सिलोनाको २ पटकको प्रस्तावलाई बार्साले नकारेकोट हियो। तर, लिभरपुलले भने आफ्नो स्टार खेलाडीलाई बारम्बार नबेच्ने भन्दै आएको छ। नेयमार विश्व कीर्तिमानी रकममा पेरिस पुगेपछि बार्सिलोनालाई थप दबाब पारेको छ।

सन् २०१३मा इन्टर मिलानबाट लिभरपुल आएका कौटिन्होले त्यसयता उत्कृष्ट प्रदर्शन गरिरहेका छन्। उनलाई भित्र्याउन त्यस समयमा लिभरपुलले ८.५ मिलियन पाउण्ड तिरेको थियो। गत सिजन १४ गोल प्रहार गरेका कौटिन्होले जनवरीमा नयाँ सम्झौता गरेका थिए। उनले गरेको पाँच वर्षको नयाँ सम्झौतामा रिलिज क्लज राखिएको छैन।

पछिल्लो पटक बार्सिलोनाले ८० मिलियन युरोको प्रस्ताव राख्दा प्रशिक्षक योर्गेन क्लपले आफ्नो क्लब ‘खेलाडी बेच्ने क्लब’ नरहेको दाबी गरेका थिए। उनले सिजनको सुरुवातअघि क्लब राम्रो स्थितिमा रहेको र त्यसलाई परिवर्तन गर्नेबारे कुनै सोच नरहेको बताए।