म्यासेडोनिया (एजेन्सी) – युरोपा लिगको साविक विजेता म्यानचेस्टर युनाइटेडलाई पराजित गर्दै गत सिजनको च्याम्पियन्स लिगको विजेता रियल म्याड्रिडले युएइफा सुपर कपको उपाधि जितेको छ। मंगलबार राति भएको खेलमा स्पेनिस टोली म्याड्रिड २-१ले विजयी भएको हो।

खेलको २४औं मिनेटमा मिडफिल्डर क्यसेमिरोले गोल गरेपछि म्याड्रिडले खेलमा अग्रता लिएको थियो। ड्यानी कर्भाजलको क्रसमा क्यसेमिरोले डिफेन्डरहरुलाई बिट गर्दै डी-बक्स भित्र उत्कृष्ट गोल गरेका थिए। दोश्रो हाफको ५२औं मिनेटमा मिडफिल्डर इस्को र ग्यारेथ बेलले राम्रो मुभ बनाएपछि म्याड्रिडले अग्रता दोब्बर बनायो। इस्कोले बक्स बाहिरबाट १-२ पास खेल्दै ३ जना डिफेन्डरलाई छलेर बेलबाट पाएको फिर्ता पासमा सजिलै गोल गरेका थिए।

खेलको ६२औं मिनेटमा रोमेलु लुकाकुले गोल गर्दै युनाइटेड खेलमा फर्कने संकेत दिए। नेमान्जा माटिचले प्रहार गरेको सट गोलरक्षक नाभासले राम्रोसँग रोक्न नसक्दा आएको रिबाउन्डमा लुकाकुले गोल गरेका थिए। खेलमा दुवै तर्फबाट थप प्रयासहरु भएपनि गोल भने थप्न सकेनन्।

प्रशिक्षक जिदानले रोनाल्डोलाई पहिलो रोजाईमा राखेका थिएनन्। उनले खेलको अन्तिम केहि समयमात्र मैदानमा बिताएका थिए। यता मोउरिन्होले भने यस ट्रान्सफर विन्डोमा भित्र्याएका तीनै खेलाडीलाई पहिलो रोजाईमा उतारेका थिए।

रियलले यसै साताको अन्त्यमा स्पेनिस सुपर कपमा बार्सिलोनाको सामना गर्दैछ। २ लेगमा हुने खेलको दोश्रो लेग अर्को साता हुनेछ। यता म्यानचेस्टर युनाइटेड भने अर्को साताको सुरुदेखि प्रिमियर लिगमा व्यस्त हुनेछ।