म्यासेडोनिया (एजेन्सी)– रियल म्याड्रिडका जिनेदिन जिदानले ग्यारेथ बेल टोलीमै रहने प्रष्ट पारेका छन् । म्यानचेस्टर युनाइटेडका प्रशिक्षक जोसे माउरिन्होले हिजो बेललाई लिन सक्ने विषयमा प्रतिक्रिया दिएपछि जिदानले त्यसको जवाफ दिएका छन् ।

सुरुवा बजार बन्द हुन एक महिना भन्दा कम समय रहेको अवस्थामा माउरिन्होले बेलका लागि प्रयास गरिने बताएका थिए । आज राती हुने युइएफए सुपर कप फाइनल खेलमा रियलले खेलाउने नखेलाउने विषयमा आफ्नो चासो रहेको उल्लेख गर्दै माउरिन्हाले भनेका थिए,‘यदि उनले खेलेनन् भने म उनलाई ल्याउने विषयमा सोच्ने छु ।’

यद्दपी बेलले सुपर कप खेले भने उनी रियलको आउने सिजनको योजना रहने माउरिन्होको अनुमान थियो । ‘मलाई लाग्दैन उनको सुरुवाको सम्भावना छ,’ उनले भनेका थिए,‘तर उनलाई खेलाइएन भने हामी उनलाई कुर्ने छौं र अन्य प्रशिक्षकसँग उनलाई भित्राउने प्रतिस्पर्धामा लाग्नेछौं ।’

युनाइटेड र रियलबीच आज राती सुपर कप फाइनल हुँदैछ । युरोपियनको नयाँ सिजन अघि च्याम्पियन्स लिग विजेता र युरोपा लिग च्याम्पियनबीच सुपर कप हुने गर्दैछ । माउरिन्होले बेलका बारेमा अड्कल काटेपछि जिदानले त्यसलाई चिर्ने प्रयास गरेका छन् ।

सुपर कपअघिको पत्रकार सम्मेलनमा जिदानले भने,‘खेलाडीले राम्रो महासुस गर्नु महत्वपूर्ण विषय हो । बेल टोलीसँग लगातार अभ्यासमा छन्, त्यो हाम्रो लागि महत्वपूर्ण हो ।’ अघिल्लो सिजन बेलका लागि कठिन रहेको स्मरण गर्दै जिदानले थपे,‘उनी चार महिना बाहिर रहे । तर अहिले उनी एकदमै केन्द्रिकृत भएका छन् । एउटा प्रशिक्षकले के भन्छन् त्यो हाम्रो लागि महत्वपूर्ण होइन । हामी भोली कसरी खेल्छौं त्यो महत्वपूर्ण हो ।’

उनले क्रिस्टियानो रोनाल्डोका विषयमा पनि त्यस्तै कथा रचिएको बताए । ‘हामी के गर्दैछौं भन्नेमा केन्द्रित छौं । त्यो हाम्रो लागि महत्वपूर्ण पनि छ । बेल रियलका खेलाडी हुन् । म यत्ति भन्न सक्छु । म सुपर कप फाइनलका बारेमा मात्र कुरा गर्न चाहन्छु,’ जिदानले भने,‘हामी यहाँ आएका छौं । म, सबै खेलाडी र समर्थक यहि खेलका लागि आएका छौं । अन्य विषयमा मेरो खासै रुचि पनि छैन ।’