बार्सिलोना (एजेन्सी) – स्पेनिस क्लब बार्सिलोनाले यस पटकको जोआन ग्याम्पर ट्रफी अन्तर्गतको खेलमा ब्राजिलियन टोली चापेकोएन्सीको सामना गर्दैछ। गत नोभेम्बरमा कोलोम्बियामा भएको विमान दुर्घटनामा परेर ७१ जनाको निधन हुँदा त्यस प्लेनमा अधिकांश मान्छे क्लबसँग सम्बन्धित रहेका थिए। बार्सिलोनाले उक्त दुर्घटनामा परेका खेलाडीको सम्मानमा चापेकोएन्सीलाई यस खेलमा सहभागिता जनाउन आग्रह गरेको थियो।

जोआन ग्याम्पर ट्रफीको सुरुवात सन् १९६६मा भएको थियो। क्लबका संस्थापक सदस्य, खेलाडी एवं अध्यक्ष सम्म रहेका जोआन ग्याम्परको नाममा यस खेलको आयोजना हुँदै आएको छ। प्रत्यक सिजन बार्सिलोनाको सिजनको पहिलो खेल अगाडी यो खेल हुने गर्दछ। यस खेलको ५२औं संस्करणमा आइपुग्दा चापेले पहिलोपटक यो अवसर पाएको हो। पछिल्लो सिजन बार्सिलोनाले इटालियन क्लब साम्पडोरियालाई ३-२ले पराजित गर्दै उपाधि जितेको थियो। अहिलेसम्म बार्सिलोनाले ३९ पटक उपाधि जितेको छ।

बार्सिलोनाले गत डिसेम्बरमा क्लबलाई यस खेलमा सहभागी हुन् आग्रह गरेपछि ब्राजिलियन क्लबले उक्त प्रस्ताव स्वीकारेको थियो। चापेकोएन्सी यस खेलमा सहभागी हुने छैटौं ब्राजिलियन टोली हो। यसअघि सहभागी मध्ये ब्राजिलियन टोली इन्टरनासिओनालले मात्र उपाधि जित्न सकेको छ।

चापेकोएन्सीबाट उक्त प्लेन दुर्घटनामा परेर ज्यान बचाउन सफल रहेका ३ मध्य एलेन रुसलले खेलमा सहभागिता जनाउने पक्का गरेको छ। अर्का खेलाडी नेटोले फुटबलमा पुनरागमन गर्ने सम्भावना रहेको र गोलरक्षक फोल्म्यानको भने खुट्टा काट्नु परेको थियो। २७ वर्षीय रुसलले भने बार्सिलोनाविरुद्धको खेलमा औपचारिक पुनरागमन गर्नेछन्।

खेल नेपाली समयानुसार मध्यरातको १२:१५ बजे सुरु हुनेछ।