म्याड्रिड (एजेन्सी)– रियल म्याड्रिडका फरवार्ड क्रिस्टियानो रोनाल्डो म्यानचेस्टर युनाइटेडविरुद्ध मंगलबार उत्रने सम्भावना रहेको छ । च्याम्पियन्स लिग विजेता रियल र युरोपा लिग विजेता युनाइटेडबीच युइएफा सुपर कपमा प्रतिस्पर्धा हुँदैछ । प्रि सिजनमा नरहेका रोनाल्डो युनाइटेडविरुद्धको २४ सदस्यीय टोलीमा समेटिएका छन् । 

प्रि सिजनको कुनै खेलमा नखेलेका रोनाल्डो सुपर कपमा अधिकांशको ध्यान खिच्ने खेलाडीका रुपमा हेरिएका छन्। उनीसँगै २४ सदस्यीय टोलीमा नयाँ सदस्य डानी सेबालोस र थियो हर्नान्डेज रहेका छन्।

बालोन डी’ओर विजेता रोनाल्डो पुरानो क्लब युनाइटेडविरुद्ध उत्रदा लुका मोड्रिच र ग्यारेथ बेलजस्ता स्टारको पनि साथ रहनेछ। रियलले गत सिजन लोनमा बिताएका बोर्जा मायोरल र जेसस भालेजोलाई पनि टोलीमा समावेश गरेको छ।

सेन्टर ब्याक भालेजोले गत सिजन इन्ट्र्याक फ्र्यांन्कफर्टबाट २७ खेल खेलेका थिए। बोरुसिया डर्टमुण्डसँगको डीएफबी कप फाइनलमा भालेजोले पुरा ९० मिनेट खेलेका थिए ।

ट्रान्सफर विन्डोको सुरुवातमा रोनाल्डो पुरानो क्लब युनाइटेड जाने हल्ला पनि चलेको थियो। कर छली अभियोग लागेपछि रोनाल्डोले रियल छोड्न चाहेको आशय व्यक्त गरेका थिए। तर, पछि उनले रियलबाट अझै उपाधि जित्न चाहेको बताउँदै हल्ला शान्त पार्ने प्रयास गरेका थिए। अहिले फेरी पछिल्लो पटक भने बेल युनाइटेड जान सक्ने हल्ला चलिरहेको छ।