पिएसजीको विजयी सुरुवात

पेरिस (एजेन्सी) – पेरिस सेन्ट जर्मेन (पिएसजी)ले फ्रान्सको शीर्ष श्रेणीको लिग अन्तर्गत पहिलो खेलमा अमिएन्सलाई २-०ले पराजित गरेको छ। भर्खरै विश्व कीर्तिमानी रकममा अनुबन्धित भएका नेयमारबिना मैदानमा उत्रिएको पिएसजीले दुवै हाफमा १/१ गोल गरेको थियो।

पिएसजीका लागि एडिन्सन कभानीले गोल गर्दै सुरुवाती अग्रता दिलाएका थिए। उनले खेलको ४२औं मिनेटमा ड्यानी आल्भेसको क्रसमा गोल गर्दै घरेलु टोलीलाई अगाडी बढाएका थिए। दोश्रो हाफको ८१औं मिनेटमा हाभिएर पास्तोरेले पिएसजीको अग्रता दोब्बर पारे। उनले एडिन्सन कभानीको पासमा गोल गर्दै पिएसजीको जित पक्का पारेका थिए।

खेल सुरु हुनुअघि बार्सिलोनाबाट विश्व कीर्तिमानी रकममा पेरिस सेन्ट जर्मेन (पिएसजी) पुगेका ब्राजिलियन फरवार्ड नेयमारको भव्य स्वागत भएको थियो। पहिलो खेलमा खेल्न नपाउने भएपछि क्लबले नेयमारलाई खेल सुरु हुनुअघी समर्थकमाझ प्रस्तुत गरेको थियो।

नेयमारले अर्को साता हुने अवे खेलमा पिएसजीको लागि डेब्यु गर्ने सम्भावना रहेको छ। त्यसपछिको साता भने नेयमारले घरेलु मैदानमा खेल्नेछन्।