पेरिसमा नेयमारको स्वागत फिल्मी शैलीमा

पेरिस (एजेन्सी) – बार्सिलोनाबाट विश्व कीर्तिमानी रकममा पेरिस सेन्ट जर्मेन (पिएसजी) पुगेका ब्राजिलियन फरवार्ड नेयमारको घरेलु मैदान पार्क डे प्रिन्सेसमा भव्य स्वागत भएको छ। पहिलो खेलमा खेल्न नपाउने भएपछि क्लबले नेयमारलाई खेल सुरु हुनुअघी समर्थकमाझ प्रस्तुत गरेको थियो।

पिएसजीका अध्यक्ष नासेर अल खलिफीसँग मन्चमा देखिएका नेयमारले समर्थकहरु सामु बोल्दै एकदम खुशी लागेको बताए। ‘म निकै खुशी छु। यहाँ आएर खेल्नु मेरो एक सपना थियो। म यस नयाँ चुनौतीको सामना गर्न तयार छु र समर्थकहरु बाट पूर्णरुपमा साथ चाहन्छु। पेरिस जादु हो।’

नेयमारले मैदानको बिचमा बल-स्किल देखाईरहँदा दर्शकदिर्घामा रहेका समर्थकहरुले निरन्तर उनको नाम लिएका थिए। त्यसपछि उनले मैदानको चक्कर काट्दै आफ्नो हस्ताक्षर अंकित बलहरु बाँडेका थिए। अन्त्यमा उनले क्लबका अल्ट्रा समर्थक टोली रहने औटेइल कर्भ क्षेत्रमा आफ्नो जर्सी उतारेर त्यसतर्फ फ्याँकेका थिए।

नेयमारले अर्को साता हुने अवे खेलमा पिएसजीको लागि डेब्यु गर्ने सम्भावना रहेको छ। त्यसपछिको साता भने नेयमारले घरेलु मैदानमा खेल्नेछन्। नेयमारलाई स्वागत गरेका केहि तस्बिरहरु: