बार्सिलोना (एजेन्सी) – विश्व कीर्तिमानी रकममा फ्रान्सेली टोली पेरिस सेन्ट जर्मेन (पिएसजी) पुगेका ब्राजिलियन फरवार्ड नेयमारले २५ मिलियन युरो बोनस नलिई बार्सिलोना छाडेको खुलासा भएको छ। नेयमारको सम्झौतामा उल्लेख भए बमोजिम सम्पूर्ण सर्त पुरा नभएकाले उक्त रकममा सहमति नमिलेको हो।

सन् २०१३मा बार्सिलोना आइपुगेका नेयमारले बार्सिलोनामा ४ वर्ष बिताएको खण्डमा उनका पिता नयमार सिनियरको कम्पनीले २५ मिलियन युरो पाउने प्रावधान रहेको थियो। तर, सम्झौतामा उल्लेख भए अनुसार तीन सर्त नेयमार पक्षले पुरा गर्न नसकेपछि उक्त बोनसको माया मारेर उनी पिएसजी प्रस्थान गरेका हुन्।

बार्सिलोनाका प्रवक्ता जोसेप विभेसले स्पेनिस पत्रिका मार्कालाई क्लबले नेयमारलाई उक्त बोनस नतिरेको प्रष्ट पारे। ‘नेयमारले बोनस प्राप्त गर्न पालना गर्नुपर्ने तीन सर्त पुरा गर्न सकेन्न। त्यसैले हामीले उनलाई कुनै किसिमको बोनस रकम उपलब्ध गराएनौं।’

विभेसका अनुसार नेयमारले निम्नानुसारका ३ सर्त पुरा गरेका थिएनन्। नेयमारले बोनस तिर्ने समय हुनुभन्दा एक महिना अगाडि क्लब छाड्न नपाउने, सम्झौता अनुसारको समयावधि क्लबमा बिताउनु पर्ने र सेप्टेम्बर महिनामा (ट्रान्सफर सकिएपछि) मात्र बोनस तिरिने सर्तहरु रहेका थिए।

नेयमारले उनले आफु र आफ्नो परिवारको खुशीको लागि बार्सिलोना जाने निर्णय लिएको बताए। ‘मलाई पैसाको लागि बार्सिलोना छाडेको भन्ने मान्छेहरुले मेरो व्यक्तिगत जीवनबारे केहि थाहा छैन। म कहिलेपनि पैसाको पछि लागेको छैन।’

‘म मात्र मेरो खुशीबारे चिन्तित छु र आफुसँगै आफ्नो परिवारको बारे सोचेको छु। म आफ्नो हृदयले भनेको कुरा सुनेर यहाँ आएको हुँ। यदि पैसाको पछि लागेको भए म कुनै अर्को देशमा अर्को लिगमा खेलिरहेको हुन्थें।’

‘मलाई दुख लाग्छ कि मान्छेहरुले यसरि सोच्छन्। म पिएसजीलाई निकै धन्यवाद दिन चाहन्छु किनकि क्लबले म माथि विश्वास राखेको छ। म क्लबले राखेको विश्वासलाई नतिजा दिएर तिर्न चाहन्छु।’