लिभरपुल (एजेन्सी) – गत सिजन इङ्गलिस प्रिमियर लिगको चौथो स्थानमा रहेको लिभरपुलले च्याम्पियन्स लिग प्लेअफको लागि जर्मनीको होफनहाइमलाई  आफ्नो प्रतिद्वन्द्वीको रुपमा पाएको छ। होफनहाइम पनि गत सिजन बुन्डेसलिगाको चौथो स्थानमा रहेको थियो।

लिभरपुल यस खेलमा जित हात पार्दै छनोट भएमा यस पटक इङ्गल्याण्डबाट ५ टोलीले च्याम्पियन्स लिगमा सहभागिता जनाउने छन्। यसअघि नै उपाधि विजेता चेल्सी, टोटेनहम हट्स्पर, म्यानचेस्टर सिटी र म्यानचेस्टर युनाइटेड समूह चरणको लागि छनोट भइसकेका छन्। म्यानचेस्टर युनाइटेड युरोप लिगको उपाधि जितेको हैसियतले स्वत: छनोट भएको हो।

लिभरपुलले होफनहाइमसँग होम एण्ड अवे लेगमा खेल्नेछ। पहिलो लेग जर्मनीमा हुनेछ भने दोश्रो लेग लिभरपुलको एनफिल्डमा खेलिनेछ। यसैगरी स्कटल्याण्डको च्याम्पियन सेल्टिकले कजाकस्तानको अस्तानासँग खेल्नेछ। अजरबैजानको कराबगले डेनमार्कको कोपनहेगनसँग खेल्दा साइप्रसको अपोएल निकोसिया र छेक गणतन्त्रको स्लाभिया प्राग भिड्नेछन्।

ग्रिसको ओलाम्पियाकोस र क्रोएसियाको रिजेका भिड्नेछन् भने इजराएलको हपोएल बिएर शेभाले स्लोभेनियाको मारिबोरको सामना गर्दैछ। इटालीको नेपोलीले फ्रान्सको निसको चुनौती लिंदा स्विट्जरल्यान्डको योङ ब्वाइजले रसियाको सीएसकेए मस्कोसँग खेल्नेछ। यसैगरि टर्कीको इस्तानबुल बसाक्सेरले स्पेनको सेभिल्लासँग भिड्दा पोर्चुगलको स्पोर्टीङ लिस्बनले रोमानियाको स्टेउआ बुकारेस्टसँग खेल्नेछ।

यी सबै खेलका विजेता टोलीले सिधै च्याम्पियन्स लिगको समूह चरणमा स्थान पाउनेछन्। यसअघी अन्य टोलीको भने टुङ्गो लागिसकेको छ।