म्याड्रिड (एजेन्सी) – स्पेनिस च्याम्पियन रियल म्याड्रिडका स्टार फरवार्ड क्रिस्टियानो रोनाल्डोले आफु इङ्गल्याण्ड फर्कने चाहेको मनसाय राखेका छन्। ३२ वर्षीय फरवार्ड रोनाल्डोले साताको सुरुवातमा अदालतमा बयान दिंदा यस्तो खुलासा गरेका हुन्।

अहिले कर छलीको आरोप खेपिरहेका रोनाल्डोले इङ्गल्याण्डमा यस्तो समस्या कहिल्यै नआएको र आफुले अब निकट भविष्यमा उतै फर्कने सोच बनाएको बताए। ‘मलाई इङ्गल्याण्डमा रहँदा कहिल्यै यस्तो समस्या आएन। त्यसैले पनि मा कुनै दिन इङ्गल्याण्ड फर्कन चाहेको छु।’ रोनाल्डोले विश्व कीर्तिमानी रकममा रियल म्याड्रिड आउनुअघि म्यानचेस्टर युनाइटेडमा रहेर ६ सिजन खेलेका थिए।

अदालतमा गएर आफुले कर छलेको सम्पूर्ण आरोप निराधार रहेको बताउँदै आएका रोनाल्डोले सोमबार यस्तो अभिव्यक्ति दिएका हुन्। अदालतमा भएको गोप्य सुनुवाईमा भएका कुराहरु सामान्यतय बाहिर आउन गाह्रो हुने भएपनि कादेना सर नामक पत्रिकाले यस्तो खुलासा गरेको हो। सिजनको सुरुतिर रोनाल्डोलाई कर छलीको आरोप लाग्दा उनले क्लब छाड्ने अभिव्यक्ति दिएका थिए।

रोनाल्डोले अर्को साता आफ्नो पूर्व क्लब म्यानचेस्टर युनाइटेडविरुद्ध खेल्दैछन्। युइएफा सुपर कप अन्तर्गत हुने खेलमा रोनाल्डोले पनि सहभागिता जनाउने बुझिएको छ।