मोनाको (एजेन्सी) – शुक्रबारदेखि सुरु भएको फ्रेन्च लिगको पहिलो खेलमा साविक विजेता एएस मोनाकोली टुलुजलाई ३-२ले पराजित गरेको छ। खेलमा २ पटक अग्रता लिएपनि त्यसलाई जोगाउन नसक्दा टुलुजले पराजयको सामना गर्नुपर्यो।

१८ वर्षे फरवार्ड किलियन बाप्पेले खेलमा आशातित प्रदर्शन गर्न सकेनन र ७५औं मिनेटमा घाइते भएपछि उनलाई प्रशिक्षकले मैदानमा पुन: प्रवेश गराएनन्। बाप्पेलाई घुँडाको चोट लागेको र उक्त चोटको विस्तृत विवरण आइतबार थाहा हुने बुझिएको छ। खेलको छैटौं मिनेटमा पाहुना टोली टुलुजका लागि जिनेदिन मसासले अग्रता दिलाएका थिए। तर, २८औं मिनेटमा जोआओ मोउटिन्होको कर्नरमा जेमर्सनले गोल गरेपछि खेल बराबरीमा आइपुगेको थियो।

दोश्रो हाफको ५३औं मिनेटमा जिम्मी डुर्माजको पासमा एन्डी डेलोर्टले गोल गरेपछि पाहुना टोलीले पुन: अग्रता लिएको थियो। तर त्यसको ५ मिनेट नबित्दै मोनाकोका कप्तान राडामेल फल्काओले गोल गर्दै खेललाई बराबरीमा ल्याए। उनले जोर्गेको क्रसमा गोल हेडरमार्फत गर्दै बराबरीमा ल्याएका थिए।

खेलको ७०औं मिनेटमा जोआओ मोउटिन्होकै पासमा कमिल जिल्कले हेडरमार्फत गोल गरेपछि घरेलु टोली मोनाकोले खेलमा पहिलो पटक अग्रता लियो। त्यसपछि दुवै टोलीबाट गोल हुन नसकेपछि मोनाकोले यस सिजनको सुरुवात जितसँगै गर्न सफल रह्यो।