पेरिस (एजेन्सी) – पेरिस सेन्ट जर्मेन (पिएसजी) पुगेका ब्राजिलियन फरवार्ड नेयमारले पिएसजीको शनिबार हुने पहिलो लिग खेल गुमाउने भएका छन्। ला लिगाले पठाउनु पर्ने अत्यावश्यक कागजपत्र पठाउन ढिलाई गरेको कारण यस्तो समस्या आएको हो।

नेयमारको अन्तर्राष्ट्रिय ट्रान्सफर प्रमाण पत्र (आइटिसी) खेल हुने एक दिन अगावै आउनुपर्ने मा त्यसो नभएकाले उनले अमिएन्स विरुद्ध शनिबार हुने लिग वनको खेलमा सहभागिता जनाउने छैनन्। क्लबले खेलअगाडी समर्थकमाझ नेयमारलाई प्रस्तुत गर्ने कार्यक्रम राखेको छ। २५ वर्षे नेयमारलाई बार्सिलोनाबाट पिएसजी ल्याउन फ्रान्सेली क्लबले विश्व कीर्तिमानी २ सय २२ मिलियन युरो तिरेको हो।

नेयमारले शुक्रबार भएको पत्रकार सम्मेलनमा आफुले पैसाको लागि बार्सिलोना छाडेको भन्ने आरोप निराधार रहेको बताएका थिए। कीर्तिमानी रकममा पिएसजी पुगेका नेयमारले उनले आफु र आफ्नो परिवारको खुशीको लागि बार्सिलोना जाने निर्णय लिएको बताए। ‘मलाई पैसाको लागि बार्सिलोना छाडेको भन्ने मान्छेहरुले मेरो व्यक्तिगत जीवनबारे केहि थाहा छैन। म कहिलेपनि पैसाको पछि लागेको छैन।’

‘म मात्र मेरो खुशीबारे चिन्तित छु र आफुसँगै आफ्नो परिवारको बारे सोचेको छु। म आफ्नो हृदयले भनेको कुरा सुनेर यहाँ आएको हुँ। यदि पैसाको पछि लागेको भए म कुनै अर्को देशमा अर्को लिगमा खेलिरहेको हुन्थें।’

‘मलाई दुख लाग्छ कि मान्छेहरुले यसरि सोच्छन्। म पिएसजीलाई निकै धन्यवाद दिन चाहन्छु किनकि क्लबले म माथि विश्वास राखेको छ। म क्लबले राखेको विश्वासलाई नतिजा दिएर तिर्न चाहन्छु।’

नेयमारलाई क्लबले विश्व कीर्तिमानी २ सय २२ मिलियन युरो रकम तिरेर भित्र्याएको हो। नेयमारले पिएसजीमा रहेर प्रति साता ५ लाख २० हजार पाउण्ड कमाउने छन्। उनको अहिलेको तलब उनले बार्सिलोनामा कमाउने भन्दा करिब दोब्बर बढी हो।