काठमाडौं (हाम्रो खेलकुद) – रुस्लान थ्री स्टार क्लबलाई क्षतिपूर्ति दिने विषयमा विवाद चर्केपछि स्थगित भएको अखिल नेपाल फुटबल संघ (एन्फा) को अर्को बैठक यहि महिनाको अन्तिममा बस्ने भएको छ। विधान अनुसार १४ दिनको पूर्व सुचना राखेर एन्फाले साउन ३२ गतेका लागि डाकेको एन्फाका प्रमुख कार्यकारी अधिकृत इन्द्रमान तुलाधरले हाम्रो खेलकुद डटकमलाई जानकारी दिएका छन्।

बैठक यसअघि जहाँबाट स्थगित भएको त्यहिबाट प्रारम्भ हुने पनि तुलाधरले बताए। यसअघि साउन ११ गते सुरु भएको बैठक थ्री स्टारलाई क्षतिपूर्ति दिने विषयमा विवाद चर्केपछि स्थागित भएको थियो। साउन १२ लाई बैठक सुरु गर्ने बताइएपनि बैठक सुरु नहुँदै सुचना टास गरे बैठक स्थगित भएको थियो । एन्फा प्रवक्ता समेत रहेका तुलाधरले थ्री स्टारको विषय, लिगको मिति लगायत सबै विषयमा निर्णय हुने बताए।

‘थ्री स्टारबाहेक सबै विषयमा सहमती जस्तै भएको थियो’ तुलाधरले भने, ‘अस्तिको एजेन्डामा अर्को एउटा थप भएको छ। बाँकी पुरानै एजेन्डा छ ।’ गत बर्ष एन्फाको गल्तिका कारण छनोट भइसकेको थ्री स्टारले एएफसी कप खेल्न पाएन। त्यसको विरोधमा थ्री स्टारले दोषीमाथि कारवाहीसहित ६ करोड रुपैयाँ क्षेतिपूर्ति माग गरेको थियो। साथै थ्री स्टारले माग पुरा नभएसम्म एन्फाले आयोजना गर्ने कुनै पनि प्रतियोगितामा भाग नलिने घोषणा गरेको थियो। त्यसै अनुसार थ्री स्टारले आफ्नै अध्यक्ष स्वर्गिय ललितकृष्ण श्रेष्ठको स्मृतिमा आयोजित यू १८ प्रतियोगितामा समेत भाग लिएन।

लिग सञ्चालन र थ्री स्टारलाई दिने भनिएको क्षेतिपूर्तिका विषयमा कार्यसमितिमा एकमत छैन । राष्ट्रिय खेलकुद परिषद् (राखेप) को समेत संलग्नतामा थ्री स्टारलाई १ करोड ५० लाख रुपैयाँ दिन एन्फाका केही जिम्मेवार पदाधिकारीले सहमति गरेपनि त्यसलाई कार्यसमितिबाट पास गर्न कठिनाई उत्पन्न हुने देखिएको छ । साउन ११ कोे बैठकका लागि एन्फाले महिला फुटबल, साफ यू १५ महिला फुटबल, उमेुर समूह, फुटसल प्रतियोगितामा सहभागिता र आयोजना, मिनी पिच र औषधि उपचार खर्चका विषयमा भने सहमति भइसकेको बताइएको छ ।

सबै पहिलाकै एन्जेडा हो अब पुरस्कारका विषय थपिएको छ । ‘एन्फाले दिने पुरस्कार शरद चन्द शाह स्मृति, रुपक स्मृति र उत्कृष्ट खेलाडी अवार्डको प्रस्ताव थपेका छौं’ उनले भने, ‘अन्य सबै पुरानै एजेन्डा हुन् ।’ अब बस्ने बैठकले सबै विषयमा निर्णय गरेरअघि बढ्ने तुलाधरले बताए । ‘अब सधै अलमल गरेर हुन्न’ उनले भने, ‘सबै एउटै विषयमा अल्झदा फुटबल गतिविधिनै नहुने खतरा बढ्दै छ । अब सबै विषय टुंगाएर विशेष साधारण सभामा जानु पर्ने अवस्था छ । ’

थ्री स्टारका विषयमा दोषीमाथि कारवाही गर्नुपर्ने चर्को अवाज समेत उठेको एन्फा बैठकले क्षतिपूर्तिको विषयमा टुंगो लगाउन नसक्ने सम्भावना पनि त्यतिनै छ । एन्फाका एक सदस्यले क्षतिपूर्तिको विषय साधारण सभा सम्म जान सक्ने सम्भावना रहेको हाम्रो खेलकुद डटकमलाई बताए ।