पेरिस (एजेन्सी) – बार्सिलोना छाडेर फ्रान्सेली क्लब पेरिस सेन्ट जर्मेन (पिएसजी) लागेका ब्राजिलियन फरवार्ड नेयामारले लियोनेल मेस्सी विश्वकै सर्वोकृष्ट खेलाडी रहेको बताएका छन्। उनले क्लब छाडेसँगै जारी गरेको वक्तव्यमा यसो भनेका हुन्।

नेयमारले मेस्सीको बखान गर्दै मेस्सीजस्तो अरु कोहि हुन नसक्ने बताए। ‘मैले विश्वकै सर्वोत्कृष्ट खेलाडीसँग खेल्ने मौका पाएँ। मैले आफ्नो जिन्दगीमा देखेको सबैभन्दा राम्रो खेलाडी मेस्सी नै हुन्, र मलाई लाग्छ उनीभन्दा राम्रो सायदै कोहि आउनेछ। मेस्सी मैदानभित्र मात्र नभएर मैदान बाहिरपनि मेरो मिल्ने साथि भए। मेस्सीसँग खेल्न पाउनु निकै गर्व लाग्यो।’

‘मैले सुआरेज र मेस्सीसँग मिलेर उत्कृष्ट साझेदारी गरेको थिएँ। खेलकुदमा एक खेलाडीले चाहने सम्पूर्ण उपाधि जितेर, त्यहाँ रहेर अनेकौं अविस्मरणीय क्षणहरु संगालेको छु। मैले आफुले आइडलका रुपमा हेरेका जाभी, इनीएस्टा, पुयोल, पिके, भाल्डेस, लगायतका खेलाडीहरुसँग खेल्ने मौका पाएँ। म बार्सिलोनालाई धन्यवाद दिन चाहन्छु र आगामी दिनमा पिएसजीबाट उत्कृष्ट प्रदर्शन गर्ने बाचा गर्दछु।’

‘मैले एक खेलाडीले जित्ने सम्पूर्ण कुरा बार्सिलोनामा रहेर पाएँ। मैले सानो उमेरमा छंदा भिडियो गेम खेल्थे, त्यसमा बार्सिलोना लिएर खेल्दा र पछि साँच्चै खेल्दा एकदम खुशी छु। मैले यहाँ अविस्मरणीय पलहरु बिताएको छु र सहदैन यो ठाउँ मेरो लागि सहरभन्दा माथि, मेरो घर जस्तो लाग्नेछ।’

‘बार्सिलोना र क्यटालोनिया सधैं मेरो हृदयमा हुनेछन्। मैले मेरो खेलजीवनमा नयाँ चुनौतीको सामना गर्ने निर्णय लिएको कारण पिएसजी आइपुगेको हुँ। यस क्लबले मलाई अगाडी बढ्ने राम्रो योजना दियो र मैले मेरो हृदयले भनेअनुसार त्यसलाई पछ्याएको हुँ।’

नेयमारलाई शुक्रबार पिएसजीले पत्रकार सम्मेलन गरेर सार्वजनिक गर्नेछ भने शनिबार समर्थकहरुमाझ प्रस्तुत गराउनेछ। फ्रान्सको लिग वनको पहिलो खेल शनिबार खेलिनेछ।