बार्सिलोना (एजेन्सी) – ट्रान्सफर विन्डोको चर्चाको शिखरमा रहेका ब्राजिलियन फरवार्ड नेयमार बार्सिलोना फर्कने भएका छन्। यसअघि सम्झौता अनुरुप २५ मिलियन पाउण्ड तिर्ने सहमति भएपनि बार्सिलोनाले नेयमारले क्लब छाड्ने भएपछि उक्त बोनस तिर्न आनाकानी गरेको हो।

आफ्नो पितासँग नेयमार (फाइल तस्बिर)

नेयमारका पिता नेयमार सिनियरलाई सम्झौता अनुरुपमा जुलाईको अन्त्यसम्म पैसा तिरिसक्नुपर्ने भएपनि बार्सिलोनाले त्यसो नगरेको बुझिएको छ। नेयमारले बार्सिलोनासँग त्यसपछि नयाँ अनुबन्धन गरिसकेको र त्यसअनुरुप उनले पुरा समय बसेमात्र उक्त बोनस दिने बार्सिलोनाको तर्क रहेको क्याटलान मिडियाले जनाएका छन्। बार्सिलोनाले नेयमार क्लबमै बसेको खण्डमा भने पुरा पैसा तिर्ने सर्ट राखेको छ।

चीनमा रहेका नेयमार सिधै ट्रान्सफर पुरा गर्न दोहा हुँदै पेरिस पुग्ने बताइएपनि अब उनि दुबई हुँदै बार्सिलोना प्रस्थान गरेका छन्। बार्सिलोनामा क्लबका व्यवस्थापनसँग बसेर यसलाई सुल्झाएर नेयमार पिएसजी जाने प्रक्रिया अन्त्य हुने बुझिएको छ। बार्सिलोनाले नेयमारले क्लब छाडेको खण्डमा २५ मिलियनबाट केहि अंशमात्र दिने बताएको छ। यता नेयमारका पिताले भने यस्तो समस्या आउने देखेरै नेयमारको पिएसजी जाने निर्णय लिन अगष्ट सम्म पर्खेका थिए।

नेयमारलाई क्लबका सिनियर खेलाडीले पनि क्लबमै बस्न निरन्तर आग्रह गर्दै आएका छन्। तर नेयमारले भने आफु पिएसजी जाने निर्णय लिइसकेको जानकारी दिएका छन्। उनले विगत केहि दिनदेखि बार्सिलोनाको प्रशिक्षणमा पनि सहभागी भएका छैनन्। गत साता सेमेडोसँगको झगडापछि क्लब र नेयमारको सम्बन्ध थप चिसिएको छ।