मायमी (एजेन्सी) – प्रि सिजनको प्रशिक्षणमा अमेरिकामा रहेका स्पेनिस महारथीबीच भएको मैत्रीपूर्ण खेलमा बार्सिलोनाले रियल म्याड्रिडलाई ३-२ले हराएको छ। २ गोलले पछि पारेको स्थितिबाट फर्किए पनि बार्साले पुन गोल गरेपछि म्याड्रिडको हार पक्का भएको थियो।

पहिलो हाफको अन्त्यसम्म दुवै स्कोर २-२को अवस्थामा पनि दोश्रो हाफको सुरुवातमै बार्साले निर्णायक अग्रता लिएको थियो। खेलको चौथो मिनेटमा लियोनेल मेस्सीले उत्कृष्ट गोल गर्दै बार्सिलोनालाई खेलमा अग्रता दिलाएका थिए। त्यसको ३ मिनेट नबित्दै इभान राकीटिचले डी-बक्स को ठिक भित्रबाट गोल गर्दै बार्साको अग्रता दोब्बर पारे। तर १४औं मिनेटमा मटियो कोभाचिचले बक्स बाहिरबाट गरेको प्रहार गोल भएपछि रियलले खेलमा फर्कने आशा देखाएको थियो।

३६औं मिनेटमा मार्को एसेन्सियोले सुरु गरेको काउन्टर अट्याकमा कोभाचिचले साथ् दिएपछि एसेन्सियोले गोल गर्दै खेललाई बराबरीमा ल्याए। पिएसजी जाने हल्ला चलेपनि नेयमार आजको खेलमा सुरुवाती एघारमा परेका थिए।

दोश्रो हाफको सुरुवातमा जेरार्ड पिकेले नेयमारको फ्रिकिकमा गोल गरेपछि बार्साले खेलमा पुन: अग्रता लिएको थियो। ६४औं मिनेटमा ग्यारेथ बेलको प्रहारलाई गोलरक्षक जास्पर सिल्लेसनले बचाउँदै खेलमा अग्रता कायम राखे। खेलमा थप गोल हुन् नसकेपछि बार्साले जित हात पारेको हो।

रियल र बार्सिलोनाले सिजनको सुरुवातमा हुने स्पेनिस सुपर कपमा पनि एकआपसमा भिड्नेछन्।