बेजिङ(एजेन्सी)– रेनाटो सान्चेसले आफु बायर्न म्युनिखमा खुसी हुन नसकेको प्रष्ट गरेका छन् । बेनफिकाबाट गत सिजन २७.५ मिलियन युरोमा बार्यन पुगेका सान्चेसले गत जर्मन बुन्डेसलिगाको महारथीबाट ६ खेलमा मात्र पहिलो रोजाइमा खेल्ने अवसर पाएका थिए ।

रेनाटो सान्चेस(बायाँ) ।

उनले आफुले क्लब छोड्न चाहेको पनि बताएका छन् । उनको यो पछिल्लो अभिव्यक्तिले म्यानचेस्टर युनाइटेडमा भने खुसीयाली छाएको हुन सक्छ । सान्चेसको रोजाई युनाइटेडमा पनि रहेको बताइएको छ ।

‘बायर्नमा पहिलो बर्ष व्यक्तिगत रुपमा सन्तोषजनक रहेन,’ सान्चेसले भने, ‘निश्चित रुपमा म धेरै खेल्न चाहन्छु । त्यसैले म परिवर्तन चाहिरहेको छु । म त्यो क्लब जान चाहन्छु जहाँ  मलाई बढी मिनेट खेल्ने अवसर मिलोस् ।’

एसी मिलान पनि उनलाई भित्राउन इच्छुक रहेको बताइएको छ । उनले थपे, ‘एसी मिलान मेरो लागि आकर्षक विकल्प हुन सक्छ । यदि त्यो अवसर मिल्यो र क्लब तयार भयो भने म त्यो विकल्पमा सोच्न सक्छु ।’

म्युनिख फर्केपछि कुनै विकल्प निस्कनेमा सान्चेस आशावादी छन् । ‘अहिले म बायर्नसँग चीन भ्रणमा छु । यहाँ पछि हामी म्युनिख पुगेर छलफलमा बस्ने छौं र आशा छ त्यहाँ विकल्प निस्कनेछ । म युवा छु । म धेरै खेल्न चाहन्छु । मलाई लाग्छ म्युनिखबाट मिलान जानु मेरो लागि सुखद हुनेछ ।’

बायर्नका प्रमुख कार्यकारी कार्ल हेनिज रुमिनिजले अघिल्ला साता मात्र क्लब उनलाई छोड्न तयार रहेको बताएका थिए । ‘उनी त्यस्ता खेलाडी हुन् जो नियमित खेल्न चाहन्छन्’ उनले भने, ‘यदि उनलाई हामीले खेल्नका लागि पर्याप्त अवसर दिन सक्ने सम्भवना रहदैन भने हामी उनलाई लोन पठाउन वा बेच्न तयार छौं ।’

गत सिजन त्यसमा पनि मुख्यतः विन्टर ब्रेक पछि लगातार खेल्ने मौका नपाउनुमा सान्चेसकै कमजोरी रहेको पनि रुमिनिजको भनाई छ । उनले थपे, ‘हो उनले धेरै खेल्न पाएनन् । तर त्यसको कारण उनी आफै हुन् ।’