म्याड्रिड (एजेन्सी)– अनेक थरी हल्लाका बीच क्रिस्टियानो रोनाल्डोले रियल म्याड्रिडमा निरन्तर आठौं सिजनलाई लिएर उत्साहित रहेको बताएका छन् । गत सिजन कर छलीको आरोप खेप्नु परेपछि रोनाल्डो क्लबसँग असन्तुष्ट रहेको समाचार बारम्बार प्रकाशित भएपछि उनले रियल छोड्न सक्ने हल्ला चलेको थियो ।

तर, उनले रियलमा रहदा खुसी रहेको र क्लबका लागि अझै धेरै उपाधि जित्न चाहेको बताएका छन् । पछिल्लो सिजन क्लब र व्यक्तिगत रुपमा उनको प्रदर्शन उच्च रहेको थियो ।

३२ बर्षे पोर्चुगिज स्ट्राइकरले मार्कासँग भनेका छन्,‘पछिल्लो सिजन उपाधिहरु जित्नु क्लबका लागि निकै महत्वपूर्ण रह्यो । व्यक्तिगत रुपमा पनि उपाधि जित्नु मेरो लागि पनि सुखद पक्ष हो । फेरी त्यहि क्रमलाई निरन्तरता दिन सकियो भने त्यो झनै उत्कृष्ट हुनेछ ।’

मैदानमा एकदमै मेहनत गर्ने विश्व उत्कृष्ट खेलाडी मध्ये रोनाल्डो पनि एक मानिन्छन् । उनी उच्च प्रदर्शनका लागि हरसम्भव प्रयास गर्छन् । उनी आफ्नो लक्ष्य प्राप्तीका लागि थप मेहनत गर्ने बताउँछन् ।

‘एक पछि अर्को बर्ष मेहनत त गनै पर्दछ । म त्यस्तै प्रयास गर्नेछु,’ चार पटकका बालोन डे’ओर विजेता रोनाल्डोले भने,‘ फुटबल मेरो जीवन हो । यो प्रति मेरो लभाव छ ।’

पछिल्लो सिजन रोनाल्डोको प्रदर्शन उत्कृष्ट रहेको थिया । उनले सबै खाले प्रतियोगितामा गरि क्लबका लागि ४२ गोल गरे । टोलीलाई ला लिगा र च्याम्पियन्स लिग उपाधि दिलाउन उनले महत्वपूर्ण भूमिका निर्वाह गरे ।

म्यानचेस्टर युनाइटेडका पूर्व स्टारले रियल पुगेयता तीन च्याम्पियन्स लिग उपाधि र दुई पटक ला लिगा उपाधि जिताइसकेका छन् । आउने सिजन अझै उपाधि जित्नेमा उनी आशावादी छन् ।