एजेन्सी – जारी प्रि-सिजनको पहिलो मैत्रीपूर्ण खेल खेलिरहेको स्पेनिस च्याम्पियन रियल म्याड्रिडले पहिलो खेलमै पराजय भोगेको छ। म्याड्रिडले आइतबार भएको खेलमा म्यानचेस्टर युनाइटेडसँग पेनाल्टीमा हार व्येहोर्यो।

निर्धारित समयको खेल १-१मा सकिएपछि खेलको छिनोफानो पेनाल्टीमार्फत गरिएको थियो। खेलको ४५औं मिनेटमा जेसे लिङ्गार्डले गोल गर्दै युनाइटेडलाई अग्रता दिलाएका थिए। तर ६६औं मिनेटमा युनाइटेडका नयाँ खेलाडी भिक्टर लिन्डफले म्याड्रिडका नवप्रवेशी थियो हर्नान्डेजलाई लडाएपछि पेनाल्टी पायो। क्यसेमिरोले उक्त पेनाल्टीलाई गोलमा परिणत गर्दै खेललाई बराबरीमा ल्याए।

पेनाल्टी सुटआउटमा भने दुवै टोलीको प्रहार फितलो रह्यो। युनाइटेडले पेनाल्टीमा २-१ले विजयी रहेको थियो। युनाइटेडका डेली ब्लिन्ड र हेनरिक मिखीतार्यानले पेनाल्टीमा गोल गरे भने एन्थोनी मार्सियाल, लिन्डेलफ र म्याकटोमिनेको पेनाल्टी गोल गर्न चुके। रियलको लागि भने केजाडा बाहेक सबैको प्रहारमा गोल हुन सकेन। म्याड्रिडका कोभाचिच, ओस्कार, हर्नान्डेज र क्यसेमिरोको प्रहार गोल भएको थिएन।

प्रशिक्षक जिदानले पहिलो हाफमा बलियो टोली उतारेपनि दोश्रो हाफमा भने युवा खेलाडीहरुलाई मौका दिएका थिए। यता मोउरिन्होले भने युवा र अनुभवी खेलाडीको सम्मिश्रण गरेर टोली उतारेका थिए।

रियलले अर्को खेलमा म्यानचेस्टर सिटीको सामना गर्दैछ। दुइ टोलीबिचको खेल बुधबार हुने कार्यक्रम रहेको छ।