न्यूयोर्क (एजेन्सी)– नेयमारको भविष्यको चर्चाले बार्सिलोनाको प्रि सिजन अमेरिका भ्रणम नै छायाँमा पारेको छ । तर, पनि ब्राजिलियन स्टार नेयमार शुक्रबार बार्सिलोनाको टोलीसँगको अभ्यासमा सहजताका साथ सहभागी भए ।

शुक्रबार अभ्यासका दौरान नेयमार (बायाँ) लुइस स्वारेज र लियोनल मेस्सी (दायाँ) का साथ ।

लिग १ को महारथी पेरिस सेन्ट जर्मेन (पिएसजी)ले २५ वर्षे सुपर स्टारलाई १ सय ९६ मिलियन पाउण्डमा किन्न तयार भएपछि स्पेनमा नेयमारको भविष्य शंकामा परेको छ । पिएसजी सरुवाका लागि २ सय २२ मिलियन युरो खर्च पनि तयार रहेको चर्चा केही दिन यता चलिरहेको छ ।

पिएसजी जाने चर्चाका बीच पनि नेयमार भने साताको सुरुवातमा बार्सिलोनाको टोलीसँगै अमेरिका यात्रामा निस्केका थिए । मध्य दिनको गर्मीमा भएको अभ्यासमा पनि उनी सक्रियताका साथ सहभागी भएका थिए । बार्सिलोनाका प्रशिक्षक इरिस्टो भाल्भेर्डे भने नेयमारको सुरुवालाई हल्ला मात्र भएको बताएका छन् । पत्रकार सम्मेलनमा भाल्भेर्डेले भने ‘नेयमार हामीसँगै छन् । निश्चय नै उनी हामीसँगै रहनेछन् । बाँकी सबै हल्ला हुन् ।’

नेयमारका सहयात्री मिडफिल्डर सर्जियो बुस्केट्सले पनि प्रशिक्षकको भनाईमा सहमति जनाउँदै भने,‘उनलाई कहाँ छु भन्ने राम्रोसँग थाहा छ । मलाई लाग्छ यो भन्दा राम्रो ठाँउ उनका लागि छैन । मलाई आशा छ उनी लामो समय यहि रहनेछन् ।’

अभ्यासका दौरान नेयमार ।

बार्सिलोनाले आइतबार युभेन्ट्ससँग खेल्दै इन्टरनेसनल च्याम्पियन्स कपको यात्रा थाल्नेछ । बार्साले भ्रमणका दौरानमा म्याचेस्टर युनाइटेड र घरेलु प्रतिद्वन्द्वि रियल म्याड्रिडको सामना गर्नेछ ।

टोलीका अर्का खेलाडी जाभियर मास्सेरानोले नेयमार बार्सिलोना छोडेर फ्रान्स जानु पर्ने कुनै कारण नभएको बताए । अझै नेयमारको सुरुवाका विषयमा टुंगो लागि नसकेको भएपनि मास्केरानो नेयमारको भविष्य बार्सिलोनामा नै देख्छन् ।

‘उनका विषयमा धेरै चर्चा छ, जसले उनी दबाबमा हुन सक्दछन्,’ इएसपिएन एफसीलाई रक्षक मास्सेरानोले भनेका छन् ‘ उनका विषयमा धेरै समाचार र हल्ला चलिरहेका हुन्छन् ।’ यस्तो परिस्थितिमा नेयमारलाई सल्लाह दिन पनि कठिन हुने बताए । ‘पहिलो त मैले उनलाई सल्लाह दिने कुरा भएन । दोस्रो म उनलाई यहाँ एकदमै खुसी देखिरहेको छु, साच्चै खुसी,’ उनले भने,‘बार्सिलोना उनका लागि उपयुक्त ठाँउ हो । तर आफ्नो बारेमा निर्णय लिन हरेक मान्छे स्वतन्त्र छ ।

मास्सेरानोले युवा नेयमार लामो समय क्लबमा रहन सक्ने विश्वास पनि व्यक्त गरे । उनले थपे,‘उमेरका कारण उनी क्लबका महत्वपूर्ण खेलाडी हुन् । उनी क्लबको भविष्य हुन् र हामीलाई आशा छ उनी साथमै रहनेछन् ।’