काठमाडौँ (हाम्रो खेलकुद) – घरेलु टोली संयुक्त अरब ईमिरेट्सलाई (युएई) २-० ले हराउदै समुह बिजेताको रुपमा उज्वेकिस्तानले २०१८ मा चिनमा हुने एएफसी यु-२३ च्याम्पियनसिपमा स्थान पक्का गरेको छ । नेपाल, लेबनान र आयोजक युएई सम्मिलित समुह ‘डी’ मा सबै खेल जित्दै उज्वेकित्सान समुह बिजेता बनेको हो ।

उज्वेकिस्तानलाई इस्लोम्ब्जोन कोबिलोभले ६७ मिनेटमा कर्नर मार्फत गोल गर्दै अग्रता दिलाएका थिए । याक्षीबोहेभको कर्नरमा हेड गर्दै कोबिलोभले गोल गरेका थिए । त्यस्तै ९० मिनेटमा सिडीकोभले उत्कृष्ट गोल गर्दै उज्वेकिस्तानको जीत सुनिश्चित गरेका थिए ।

प्रतियोगितामा लेबनानसँग ३-१ को बिजयी सुरुवात गरेको उज्वेकिस्तानले नेपाललाई २-० ले हराएको थियो । त्यस्तै पहिलो खेलमा नेपाललाई ५-० ले हराएको घरेलु टोली युएईले दोस्रो खेलमा लेबनानलाई १-० ले पराजित गरेको थियो ।

२०१८ मा हुने एएफसी यु-२३ च्याम्पियनसिपमा १६ टोलीले भाग लिनेछन् । ४० टोलीलाई १० समूहमा विभाजन गरिएको छनोट चरणमा हरेक समुहको बिजेता टोली स्वत: छनोट हुनेछ भने ५ उत्कृष्ट उपविजेता पनि अन्तिम चरणका लागि छनोट हुन्छन् । यदि आयोजक चिन छनोट चरणबाट स्वत: छनोट भएमा छैटौं उत्कृष्ट टोली पनि अगाडी बढ्नेछ । उत्कृष्ट उपविजेताको रुपमा छनोट हुने सम्भावना भएपनि युएईले अन्य समूहको नतिजा कुर्नु पर्ने हुन्छ ।