पेरिस (एजेन्सी)– नेयमार जस्तै प्रस्ताव आउँदा पनि क्लबमै रहनेमा विश्वकै चर्चित क्लब मध्येको एक स्पेनिस टोली बार्सिलोना विश्वस्त देखिएको छ । २ सय २२ मिलियन पाउन्ड सुरुवा रकम तिरेर पनि नेयमारलाई भित्राउन फ्रेन्च टोली पेरिस सेन्ट जर्मेन (पिएसजी) तयार भएको समाचार सार्वजनिक भएपछि बार्सिलोनाका अधिकारीको भनाई सर्वाजनिक भएको छ ।

२ सय २२ मिलियन पाउन्ड अहिले सम्मको कीर्तिमानी सरुवा रकमको दोब्बर रकम हो । अर्को सिजन च्याम्पियन्स लिग उपाधिको चुनौतिलाई बलियो बनाउने क्रममा पिएजसी नेयमारका लागि ठूलो रकम तीर्न तयार रहेको सञ्चारमाध्यमहरुले उल्लेख गरेका छन् । तर, बार्सिलोनाका प्रवक्ता जोसेप भिभ्सले भने अहिले चलेका हल्लालाई निराधार भएको बताएका छन् ।

‘नेयमारलाई बेच्ने विषय हाम्रो कल्पना भन्दा बाहिरको विषय हो । हाम्रो चासो भनेको उनी यहाँ कसरी खुसी रहन्छन् भन्ने हो,’ भिभ्सले इएसपिएनलाई भनेका छन्,‘ उनले यहाँ उच्च प्रदर्शन गरिरहेका छन् । पछिल्लो सिजनमा पनि उनको प्रदर्शन उच्च रह्यो । उनी विश्वकै उत्कृष्ट खेलाडी मध्येका एक हनु् । क्लब उनीसँग र उनी क्लबसँग खुसी छन् । हामीलाई आशा छ अघिल्लो सिजन भन्दा पनि आउने सिजन उनको प्रदर्शन अझै स्तरीय हु्नेछ ।’

उत्कृष्ट खेलाडीलाई क्लबले आफैसंग राख्न चाहेको प्रष्ट पार्दै प्रवक्ता भिभ्सले थपे,‘ नेयमार हाम्रो क्लबको मुख्य अनुहार मध्येका एक हुन् ।’ २५ बर्षे नेयमारको बार्सासँगको सम्झौता सन् २०२१ सम्मको छ । बालोन डी’ओरका दाबेदार मध्येका एक नेयमार लियोनल मेस्सीसँगै खेलेर त्यो उपाधि जित्ने सम्भावना नरहने अनुमानका कारण उनीले अन्य क्लब रोज्न सक्ने अनुमान बेला बखत चलिरहन्छन् ।

सान्तोषबाट २०१३ मा बार्सिलोना पुगेका नेयमारले १ सय ८६ खेलमा १ सय ५ गोल गरिसकेका छन् । यसबीचमा उनले टोलीका लागि दुईवटा ला लिगा उपाधि, तीन वटा कापा डेल रे र २०१५ मा च्याम्पियन्स लिग उपाधि जितेका थिए ।