काठमाडौँ (हाम्रो खेलकुद) – एएफसी यू२३ च्याम्पियनसिपको छनोट चरण अन्तर्गत समूह ‘डी’को दोश्रो खेलमा नेपालले उज्वेकिस्तानसँग २-०को हार व्येहोरेको छ। यस हारसँगै नेपालको एएफसी यू२३ च्याम्पियनसिपको अन्तिम चरणमा पुग्ने सम्भावना समाप्त भएको छ।

खेलको १४औं मिनेटमा उज्वेकिस्तानका कप्तान उरिन्बोभ जाबीखिल्लोले टोलीलाई अग्रता दिलाउने सुवर्ण मौका चुकाएका थिए। सिक्स यार्ड बक्सबाट आएको लो क्रसमा किपरसँगै सबै डिफेन्डर बिट हुँदा बललाई पोष्टको दिशातर्फ दिन चुकेका थिए। उज्वेकिस्तानले निरन्तर आक्रमण गरेपनि नेपाली डिफेन्सले त्यसलाई विफल तुल्याएको थियो।

तर खेलको २१औं मिनेटमा तुर्सुनोभ दोस्तोन्बेकले हेडरमार्फत गोल गर्दै टोलीलाई अग्रता दिलाए। उनले सिदिखोभ जाबोखिरको क्रसमा गोल गरेका थिए। नेपालले केहि राम्रो आक्रमण सिर्जना गरेपनि त्यसको सदुपयोग भने गर्न सकेन। उज्वेकिस्तानको हाफमा पुगेपछि नेपाली खेलाडी केहि हतारिएका देखिएका थिए।

प्रशिक्षक राजु काजी शाक्यले पहिलो हाफमै एक खेलाडी परिवर्तन पनि गरेका छन्। उनले मिडफिल्डर पुजन उपरकोटीको स्थानमा सुनिल बललाई मैदान प्रवेश गराएका छन्। सुनिलको आगमनसँगै टोली आक्रमणमा भने केहि बलियो देखिएको छ। पहिलो हाफको इन्ज्युरी समयको दोश्रो मिनेटमा सुनिल बलको क्रसमा अन्जन विष्टले प्रहर गरेको ओभरहेड किकले गोलरक्षकलाई कष्ट दिन सकेको थिएन।

दोश्रो हाफको ५८औं मिनेटमा कप्तान जाबीखिल्लोले जासुर्बेक याक्शीबोभको क्रसमा पाएको फ्री हेडरलाई पोष्टको दिशा दिन सकेनन्। ८०औं मिनेटमा उज्बेकिस्तानका गानिएभ अजिजोनले उत्कृष्ट वन टु पासको मुभ बनाउँदै उज्वेकिस्तानको अग्रता दोब्बर पारेका थिए। उनले नेपालको डी-बक्सको ठिक बाहिरबाट कप्तान जाबीखिल्लोसँग पास खेल्दै फिर्ती पास भने बक्स भित्र लिएर गोलरक्षक एलन न्यौपानेलाई बिट गरेका थिए।

खेलको ९०औं मिनेटमा गोलरक्षक एलन न्यौपानेले वन भर्सेस वनको स्थितिमा उत्कृष्ट सेभ गरेका थिए।  दोश्रो हाफको इन्ज्युरी समयको दोश्रो मिनेटमा उज्वेकिस्तानका सिदोरोभ आन्द्रेले शरोफ मुख्त्दिनोभको क्रसलाई खाली पोष्टमा छुन सकेका थिएनन्।

उज्वेकिस्तान २-०को जितसँगै अंक तालिकाको शीर्ष स्थानमा पुगेको छ। कुनै अंक जोड्न नसकेको नेपाल भने पुछारमै अड्केको छ। सोमबार हुने दोश्रो खेलमा घरेलु टोली युएई र लेबनान भिड्दैछन्। समूह चरणको अन्तिम खेलमा नेपालले बुधबार लेबनानको सामना गर्नेछ।