काठमाडौँ (हाम्रो खेलकुद) – घरेलु टोली युएईसँग पहिलो खेलमा ५-० ले पराजित भएको नेपाल यु-२३ टोलीका प्रशिक्षक राजु काजी शाक्यले उज्बेकिस्तानविरुद्ध आज हुने दोस्रो खेलको पहिलो रोजाईमा तीन खेलाडी परिवर्तन गरेका छन् ।

उज्बेकिस्तान विरुद्ध दोस्रो खेल खेल्दै गरेको नेपालका लागि पहिलो रोजाइमा शाक्यले मिडफिल्डमा सुनिल बल र हेमन्त थापामगरको स्थानमा पुजन उपरकोटी र विश्वास श्रेष्ठलाइ मौका दिएका छन् । त्यस्तै लेफ्ट डिफेन्समा अमित तामाङको ठाउ कमल श्रेष्ठले लिएका छन् । पहिलो खेलमा अमितको स्थानमा परिवर्तित खेलाडीको रुपमा मैदान प्रवेश गरेका कमल दोस्रो खेलमा भने पहिलो रोजाईमा पर्न सफल भएका छन् । त्यस्तै पुजन र विश्वासले पनि परिवर्तित खेलाडीको रुपमा पहिलो खेलमा मौका पाएका थिए ।

पहिलो खेलको हार पछि नेपाली टोली दबाबमा छ । आजको खेल गुमाएमा नेपाल छनोट चरणबाट बाहिरिने छ । उता पहिलो खेलमा उज्बेकिस्तानले लेबनानलाई ३-१ ले हराएको थियो ।

नेपाल र उज्बेकिस्तान बीचको खेल आज राती नेपाली समय अनुसार ८:१० बजे सुरु हुनेछ ।

नेपालको सुरुवाती ११:

गोलरक्षक: एलन न्यौपाने

डिफेन्स: दिनेश राजवंशी – अनन्त तामाङ – गौरब बुढाथोकी –कमल श्रेष्ठ

मिडफिल्ड: सुमन लामा – हेमन गुरुङ– पुजन उपरकोटी – विश्वास श्रेष्ठ

फरवार्ड: बिमल घर्ती मगर – अन्जन बिष्ट