काठमाडौँ (हाम्री खेलकुद) – एएफसी यू २३ च्याम्पियनसिपको छनोट चरणको दोश्रो खेलमा नेपालले उज्बेकिस्तानको सामना गर्दैछ। नेपाली समयानुसार रातको ८:१० बजे सुरु हुने खेलमा नेपालको कप्तानी विमल घर्ति मगरले गर्नेछन्।

प्रशिक्षक राजु काजी शाक्यले युएईविरुद्ध उत्रिएको टोलीबाट केहि परिवर्तन गर्ने सम्भावना रहेको छ। पछिल्लो खेलमा खराब प्रदर्शन गरेका लेफ्ट ब्याकमा अमित तामाङको स्थानमा विश्वास श्रेष्ठको सम्भावना रहेको छ भने राइट ब्याक दिनेश राजबंशीको स्थानमा कमल श्रेष्ठ आउन सक्नेछन्।

पछिल्लो खेलमा मिडफिल्डमा हेमन्त र हेमनको उपस्थितिले डिफेन्सिभ रुपमा कमजोर भएका कारणले प्रशिक्षकले सुरुवाती रोजाईमा पुञ्ज उपरकोटीलाई राख्ने सम्भावना उत्तिकै छ। बंगलादेश विरुद्ध मैत्रीपूर्ण खेल र युएई विरुद्धको पहिलो खेलमा सुरुवाती ११मा खेलेका हेमन र हेमन्तको जोडीले मिडफिल्ड सम्हाल्न सकेको थिएन। तर पुजनको आगमनसँगै दुवै खेलमा केहि स्थिरता देखिएको थियो।

आक्रमणमा भने कप्तान विमल र अन्जन विष्टले जिम्मेवारी सम्हाल्नेछन्।

सम्भावित सुरुवाती ११:

गोलरक्षक: एलन न्यौपाने

डिफेन्स: कमल श्रेष्ठ  – अनन्त तामाङ – गौरब बुढाथोकी –विश्वास श्रेष्ठ

मिडफिल्ड: सुमन लामा – पुजन उपरकोटी – हेमन्त थापा मगर – सुनिल बल

फरवार्ड: बिमल घर्ती मगर – अन्जन बिष्ट