काठमाडौं (हाम्रो खेलकुद)– रुस्लान थ्री स्टार क्लबका मिडफिल्डर निराजन खड्का आफ्नो विचार प्रष्ट राख्ने खेलाडीका रुपमा पनि चिनिन्छन् । नेपाली फुटबलका बारेमा उनी बेला बेला आफ्ना अनुभवलाई विभिन्न सञ्चारमाध्यम र सामाजिक सञ्जालमार्फत सार्वजनिक गर्दै आएका छन् ।

निराजन खड्का । फाइल तस्बिर

राष्ट्रिय फुटबल टोलीबाट पनि लामो समय खेलिसकेका निराजनले संयुक्त अरब इमिरेट्स (युएई) मा जारी एएफसी यू २३ च्याम्पियनसिप छनोटमा नेपालको पहिलो खेलको प्रदर्शन र त्यसपछि आएका प्रक्रियापछि आफ्नो भनाई सामाजिक सञ्जालमार्फत सार्वजनिक गरेका छन् ।

आयोजनक युएईसँग पहिलो खेल शनिबार ५–० को हार बेहोरिसकेको नेपाली युवा टोलीले आज नेपाली समय अनुसार राती ८ः१० बजे सुरु हुने खेलमा उज्वेकिस्तानको सामना गर्नेछ । निराजनले यु २३ सँगै नेपालले अन्य प्रतियोगिताका तयारीमा अपनाउँदै आएको रणनीतिका विषयमा प्रश्न मात्र गरेका छैनन्, अहिलेको आधुनिक फुटबललाई कसरी अघि बढाउन सकिन्छ भन्नेमा पनि आफ्नो धारणा राखेका छन् ।

फेसबुकमार्फत निराजनले व्यक्त गरेको विचार

वर्तमान फुटबल अत्याधुनिक भईसकेको छ हजुर । कस्तो टिम सँग खेल्ने हो ? कस्तो वातावरणमा,तापक्रममा ? कसरी ? त्यहि अनुसार तैयारी कसरी र मैत्रीपूर्ण खेल कस्तो टिम सँग खेल्दा ठीक होला ? हारे पनि जिते पनि सिक्यौ के के ? र हाम्रो वास्तविक ल्याकत र अवस्था के हो र के आशा गर्ने ? यो त अहिले साधारण फुटबल प्रेमीले नै बताउँन सक्छन् जस्तो लाग्दछ, मलाई।

समयको माग अनुसार अघि बढ्न सकिएन भने हाम्रो फुटबल यस्तै रहिरहने कुरामा दुई मत छैन । पहिले पनि र अहिले पनि त्यही छौ हामी, हैन र ? दक्षिण एसियामा र त्यस भन्दा माथी कहिले ? अहिले जित हार भन्दा पनि खेल र खेलाडीलाई व्यवसायिक बनाउनु, निजी तथा व्यवसायिक संस्थाहरुलाई लगानीमा प्रोत्साहन गर्नु ,घरेलु फुटबललाई बलियों र प्रतिस्पर्धात्मक नबनाई हुन्न ।

दुरदर्शी ,पारदर्शिता ठूलो लगानी र निरन्तर योग्य र समय सापेक्ष परिवर्तन, प्राविधिक र विशेषज्ञहरुको अत्याधिक खाँचों देख्छु म त । कोही पनि नरिसाउनु होला है? म जे देख्छु त्यही भन्छु ,कसै संग निजी रिस र जलन छैन हजुर । म एउटा चेतनशील,कर्मठ र भावनात्मक खेलाडी हु र फुटबलको र विशेष गरि खेल, खेलाडी ,कोच लगायत सम्पूर्ण प्रणालीको सकारात्मक विकास परिवर्तन र विकास चाहन्छु । जवाफदेही गोर्खालीपन, कहिले हार नमार्ने,कर्मठ जनशक्तिको कमी पनि देख्छु । विकासमा र व्यवसायिकतामा सम्झौता कदापी गर्नुहुन्न ।