काठमाडौं (हाम्रो खेलकुद)– एएफसी यू २३ च्याम्पियनसिप छनोटमा नेपाली युवा टोलीको सुरुआत निकै कमजोर ढंगले भएको छ । आयोजक यूएईसँगको पहिलो खेलमा नेपाली टोलीले ५–०को फराकिलो हार व्येहोरेको छ ।

चर्को गर्मीकाबीच नेपाली समय अनुसार राती ८ः१० मा सुरु भएको खेलमा नेपाल पहिलो हाफको कुनै पनि समय सम्हालिन सकेन र एक पछि अर्को गोलको सामना गर्न बाध्य भयो । ३३ मिनेट भित्र नै नेपाली टोलीले ४ गोल खाइसकेको थियो । पहिलो गोल टोलीले आठौं मिनेटमा खायो ।

अहमद हुसेनले आठौं र उनले नै दोस्रो गोल २०औं मिनेटमा गरेका थिए । खालिदको क्रममा मोहम्मद अलकबेरीले २३ औं मिनेटमा हेड गोल गर्दै नेपाली टोलीमाथि दबाब थपे । ३३ औं मिनेटमा यूएइले पेनाल्टीमा अर्को गोल थपेको थियो । पेनाल्टी बक्समा दिनेश राजवंशीले ह्यान्ड गरेपछि युएईले पेनाल्टी पाएको थियो । खलिद अब्दुल रहिमले पेनाल्टीमा गोल गर्दै गोलअन्तरलाई बढाएका थिए ।

पहिलो हाफमा ४-०ले पछाडी पारेको टोलीले दोश्रो हाफमा केहि सम्हालिएको प्रदर्शन गरेपनि उल्लेख्य आक्रमण भने बुन्न सकेन। खेलको ६०औं मिनेटमा युएईका मोहम्मद रशिदले हेडरमार्फत गोल गर्दै घरेलु टोलीलाई ५-०को अग्रता दिलाएका थिए। खेलमा दुवै टोलीबाट थप गोल हुन नसकेपछि नेपालले पहिलो खेलमा ५-०को पराजय भोग्यो।

जितसँगै युएईले समूहमा महत्त्वपूर्ण ३ अंक जोडेको छ। यता, पहिलो खेलमै फराकिलो अन्तरले पराजय भोगेको नेपाली टोली अंकविहिन रहेको छ। नेपाली टोलीले समूहको अन्य खेलमा सोमबार उज्वेकिस्तान र बुधबार लेबनानको सामना गर्नुपर्नेछ। लेबनान र उज्वेकिस्तानले आज समूह चरणको दोश्रो खेलमा भिड्दैछन्।