काठमाडौं (हाम्रो खेलकुद)– नेपालले भदौंमा साफ यू १५ च्याम्पियनसिप फुटबल आयोजना गर्ने भएको छ । दक्षिण एसियाली फुटबल महासंघ (साफ) को कार्यक्रम अनुसार हुने च्याम्पियनसिपमा नेपालसहित दक्षिण एसियाका ६ राष्ट्रको सहभागिता रहनेछ ।

हाल यू१६ एकेडमीमा रहेको टोली

अफगानिस्तान साफबाट अलग भैसकेको छ भने पाकिस्तानले भाग नलिने अखिल नेपाल फुटबल संघ (एन्फा) का प्रमुख कार्यकारी अधिकृत इन्द्रमान तुलाधरले जानकारी दिए । भदौ २ देखि ११ गते सम्म सातदोबाटोस्थित एन्फा कम्प्लेक्स मैदान र हलचोकस्थित शसस्त्र प्रहरी बलको मैदानमा च्याम्पियनसिप सञ्चालन हुनेछ ।च्याम्पियनसिपमा हुने १० खेलमध्ये फाइनलसहित ८ खेल सातदोबाटो र बाँकी २ खेल हलचोकस्थित शसस्त्र प्रहरी बलको मैदानमा हुने तुलाधरले बताए । हलचोकमा एउटा सेमिफाइनल र तेस्रो स्थानको खेल हुनेछ ।

नेपाल समूह ‘बी’मा भारत र माल्दिभ्ससँग रहेको छ । समूह ‘ए’ मा बंगलादेश भुटान र श्रीलंका छन् । राउन्ड रोविन लिगपछि समूहका शीर्ष दुई टोली सेमिफाइनल पुग्नेछन् । नेपालले भदौं ५ मा आफ्नो पहिलो खेलमा माल्दिभ्सको सामना गर्नेछ भने त्यसको दुई दिनपछि भारतसँग प्रतिस्पर्धा गर्नेछ ।

च्याम्पियनसिपका लागि नेपालको तयारी आइतबारबाट सुरु हुने तुलाधरले जानकारी दिए । एन्फा एकेडेमीमा रहेका बाहेकका लागि पनि छनोटमा बोलाउने विषयमा एन्फामा छलफल भइरहेको उनले बताए । यसअघि साफ यू १६ आयोजना हुने गरेपनि क्षेत्रियस्तरको यू १५ पहिलो पटक आयोजना हुन लागेको हो ।

तीन बर्षअघि नेपालले पहिलो पटक साफ यू १९ च्याम्पियनसिप आयोजना गरेको थियो । विमल घर्तीमगरको कप्तानीमा रहेको नेपाली टोली उपाधि जितेको छ । अहिले विमलकै कप्तानीमा नेपाल एएफसी यू २३ च्याम्पियनसिप छनोट खेल्न युएइमा रहेको छ ।