काठमाडौँ (हाम्रो खेलकुद) – नेपालसँग १-०ले पराजित भएसँगै बंगलादेशका प्रशिक्षक एन्ड्रयु ओर्डले नेपाली टोलीको एएफसी कपमा रहेको आशा विमलको प्रदर्शनमा टिकेको बताए। उनले विमल निकै छिटो-छरितो रहेको र नेपालको फरवार्ड लाइनका ‘डरलाग्दा खेलाडी’को संज्ञा दिए।

खेलपछि आयोजित पत्रकार सम्मेलनमा बोल्दै ओर्डले नेपाली टोलीले खेल जितेपनि खासै फरक नरहेको बताए। ‘नेपालले मैले सोचेजस्तै खेल खेल्यो। उनीहरुको फरवार्डले पाएको मौकाको राम्रो सदुपयोग गर्दै गोल गर्न सफल रह्यो तर हाम्रा फरवार्डहरु महत्त्वपूर्ण समयमा चुके। सायद हामीले आफ्नो अवसरहरुमा सहि निर्णय लिएको भए फरक नतिजा आउने थियो।’

उनले नेपालका कप्तान विमलको पनि खुलेर तारिफ गरे। ‘विमल निकै उत्कृष्ट खेलाडी हुन्। उनि अरु खेलाडीको तुलनामा निकै छिटो-छरितो देखिए। उनको उपस्थितिमा नेपालको फरवार्ड लाइन बलियो थियो र उनले गोल पनि आफ्नो स्तर अनुसारकै गरे।’

उनले नेपालको एएफसी च्याम्पियनसिपमा छनोटको बारेमा बोल्दै केहि आशा भने रहेको बताए। ‘फुटबलमा केहि पनि किटान गर्न सकिन्न। नेपालको खेल हेर्दा अहिले केहि भन्न सक्ने अवस्था छैन। विमल एकदमै राम्रा खेलाडी हुन्, उनको प्रदर्शनले नेपाल अर्को चरणमा नपुग्ला भन्न सकिन्न। आजको खेलमा नेपाली समर्थकहरुको कारण पनि नेपाललाई केहि सहज भएको हो। युएईमा यस्तो समर्थन नहुने हुनाले त्यसले प्रदर्शनमा केहि असर पक्कै गर्छ।’

नेपालको खेलबारे बोल्दै उनले टोलीमा मिडफिल्डमा केहि समस्या रहेको बताए। ‘नेपालको मिडफिल्ड तुलनात्मक रुपमा कमजोर थियो। डिफेन्सबाट बल सिधै मिडफिल्डमा आइरहेको थियो। हामीले मिडफिल्डमा कब्जा जमाएको कारण केहि मौका बनाएका थियौं तर फरवार्ड लाइनमा चुक्न पुग्यौं।’

उनले सातदोबाटोको टर्फमा खेल्न पनि केहि असहज रहेको बताए। ‘यहाँको टर्फमा ग्राउण्ड पास खेल्न अलिकति गाह्रो छ। हामीले उता हुँदा त्यसै किसिमको प्रशिक्षण गर्दै आएका थियौं, तर यहाँ त्यसअनुसारको खेल खेल्न सकिएन। यहाँ एअर बल खेल्ने टोलीलाई फाइदा पुग्ने टर्फ छ। बल अलि छिटो चल्ने भएकाले हामीलाई केहि असहज महसुस भएको हो।’

बंगलादेश एएफसी यू२३को छनोट चरणमा समूह ‘इ’मा रहेको छ। उक्त समूहमा बंगलादेशसँगै आयोजक प्यालेस्टाइन, जोर्डन र ताजिकिस्तान रहेका छन्।