काठमाडौँ (हाम्रो खेलकुद) – एएफसी यू२३ च्याम्पियनसिपको छनोट चरणको तयारीमा रहेको नेपाल यू२३ राष्ट्रिय फुटबल टोलीले मंगलबार मैत्रीपूर्ण खेलमा बंगलादेशको यू२३ टोलीको सामना गर्दैछ।

खेलको पूर्वसन्ध्यामा आयोजित पत्रकार सम्मेलनमा बोल्दै नेपाली टोलीका प्रशिक्षक राजु काजी शाक्यले भोलीको खेलले प्रतियोगिताको तयारीमा ठुलो मद्दत पुर्याउने बताए। ‘हामीले बंगलादेशसँगको खेललाई तयारीको अन्तिम चरणको रुपमा लिएका छौँ। हामीले भोलि गरेको प्रदर्शनकै आधारमा युएईमा खेल्ने हो। त्यहाँ रहेका टोली केहि माथिल्लो स्तरको भएपनि हामीलाई भोलीको खेलले केहि मद्दत पुग्नेछ।’

टोलीमा नयाँ अनुहार पनि रहेकाले यस खेलले टोलीलाई सेट हुन् मद्दत पुर्याउने प्रशिक्षक शाक्यको बुझाई छ। ‘हामीले केहि नयाँ खेलाडीलाई पनि टोलीमा समावेश गरेका छौँ। उनीहरुको प्रदर्शन हेरेर युएईमा हामीलाई टोली तयार पर्न मद्दत पुग्नेछ। यसले हामीलाई टोलीको कम्जोर र बलियो पक्ष पहिल्याउन पनि सहयोग गर्छ।’

उनले नेपालको समूहमा बलियो टोलीहरु रहेपनि नेपालले राम्रो प्रदर्शन गर्ने आशा लिएको बताए। ‘नेपालको समूहमा उज्बेकिस्तान, आयोजक युएई र लेबनान जस्ता टोलीहरु रहेका छन्। हाम्रो टोली उनीहरुको तुलनामा कमजोर भएपनि हाम्रो प्रदर्शनमा विगतभन्दा सुधार आउने विश्वास छ।’ एएफसी यू२३ च्याम्पियनसिपको पछिल्लो संस्करणको उपाधि जापानले जितेको थियो।