एजेन्सी – विश्व फुटबल जगतमा गत सिजन सर्वाधिक कमाइ गरेका फुटबल प्रशिक्षकहरुको सर्वेक्षण प्रतिष्ठित फुटबल पत्रिका फ्रान्स फुटबलले सार्वजनिक गरेको छ। शीर्ष ५ प्रशिक्षकमा प्रिमियर लिगका २ जना छन् भने अन्य लिगका १/१ जना प्रशिक्षक अटाएका छन्।

५. पेप गुआर्डीओला
गत सिजन म्यानचेस्टर सिटि आएका प्रशिक्षक पेप गुआर्डीओलाले गत सिजन १२.५ मिलियन युरो कमाई गरे। पेपको पहिलो सिजनमा सिटिले सोचेअनुरुप प्रदर्शन नगरेपनि उनले राम्रै पैसा हात पारे। यस सिजन उपाधि जितेर उनि आफ्नो कमाइ अझै बढाउने सुरमा हुनेछन्।

४. कार्लो एन्चेलोटि
बायर्न म्युनिखलाई लिग उपाधि दिलाएका प्रशिक्षक एन्चेलोटिले गएको सिजन १३.७ मिलियन युरो कमाए। च्याम्पियन्स लिगमा सुखद प्रदर्शन गर्न नसकेपनि घरेलु प्रतियोगितामा भने बायर्नको प्रदर्शन उल्लेख्य रहेको थियो।

३. लौरेंट ब्लांक
पेरिस सेन्ट जर्मनबाट बर्खास्त भएका प्रशिक्षक लौरेंट ब्लांकले गएको सिजन १७.३ मिलियन युरो कमाइ गरे। उनले आफु बर्खास्तीमा पारेको क्षतिपूर्तिले नै विश्वको तेश्रो बढी कमाउने प्रशिक्षक बन्न सफल रहे।

२. मार्चेलो लिप्पी
चीनको राष्ट्रिय फुटबल टोली सम्हाल्ने जिम्मेवारी लिएका इटालियन प्रशिक्षक मार्चेलो लिप्पीले २०.३ मिलियन युरो कमाए। उनले टोलीलाई विश्वकप पुर्याउने लक्ष्य सहित जिम्मेवारी लिएपनि उक्त योजना भने सफल हुन सकेको छैन।

१. जोसे मोउरिन्हो
म्यानचेस्टर युनाइटेडका लागि मोउरिन्होको पहिलो सिजन मिश्रित रह्यो। मोउरिन्होले व्यक्तिगत रुपमा २४.२ मिलियन युरो कमाए। घरेलु लिगमा आशातित प्रदर्शन गर्न नसकेपनि टोलीले युरोप लिग जित्दै च्याम्पियन्स लिगमा छनोट भयो। यसबाहेक टोलीले घरेलु प्रतियोगितामा पनि उपाधि जित्दै सिजनको सुखद अन्त्य गर्यो।