एजेन्सी – स्पेन यू२१ टोलीका कप्तान एवं एटलेटिको म्याड्रिडका मिडफिल्डर साउल निगुएजले एटलेटिको म्याड्रिडसँग सन् २०२६सम्मका लागि क्लबमा रहने नयाँ सम्झौता गरेका छन्। यससँगै उनको क्लब छाड्ने हल्ला पनि लामो समयसम्मका लागि बन्द हुने भएको छ।

सन् २००७मा एटलेटिको म्याड्रिडको एकेडेमी प्रवेश गरेका साउलले म्याड्रिडमै आफ्नो खेलजीवन बिताउने बताए। यसअघि सन् २०२१ सम्मको करार बाँकी हुँदाहुँदै उनले त्यसमा थप ५ वर्षे करार गरेका हुन्। बार्सिलोना र म्यानचेस्टर युनाइटेडले यसै सिजनको सुरुवातमा उनलाई भित्र्याउने चाह देखाएका थिए। तर साउलले आफु म्याड्रिड छाडेर कतै नजाने बताउँदै नयाँ सम्झौता गरेका हुन्।

‘म निकै खुसि छु। मेरो लागि एटलेटिको परिवार हो र मलाई यहाँभन्दा राम्रो ठाउँ कतै हुँदैन। म आफ्नो तर्फबाट सक्दो मेहेनत गर्नेछु र क्लबले मप्रति देखाएको विश्वासलाई सहि तुल्याउन लागि पर्नेछु।’

साउलले भर्खरै सम्पन्न युरो यू२१ च्याम्पियनसिपमा ५ गोल गर्दै टोलीलाई दोश्रो स्थानसम्म पुर्याएका थिए। फाइनलमा जर्मनीसँग १-०ले पराजित स्पेनी टोलीको कप्तान रहेका साउलले इटालीविरुद्ध सेमिफाइनलमा ह्याट्रिक गरेका थिए।

यसअघि ७१ मिलियन पाउण्ड रिलिज क्लज रहेको साउलको करारमा अब नयाँ रिलिज कलज थपिएको छ। क्लबले त्यसबारे भने केहि जानकारी दिएको छैन। साउलसँगै क्लबका फरवार्ड एन्टोइन ग्रिज्मनले पनि गतसाता आफ्नो करार थपेका थिए।