एजेन्सी – सेमिफाइनलमा पराजित टोली मेक्सिको र पोर्चुगल फिफा कन्फेडेरेसन कप अन्तर्गत तेश्रो स्थानको खेलको लागि आज मैदानमा उत्रदैछन्। मेक्सिकोले जर्मनी र पोर्चुगलले चिलीसँग सेमीफाइनलमा पराजित भएको थियो।

समूह चरणमा यी दुई टोलीको खेल हुँदा खेल २-२को बराबरीमा सकिएको थियो। खेलको अन्तिम मिनेटमा हेक्टर मोरेनोले हेडर गोल गर्दै अंक बाँड्न बाध्य पारेका थिए। मेक्सिको र पोर्चुगलबिचको पछिल्ला ४ खेलमा पोर्चुगल अपराजित रहेको छ।  पोर्चुगल उक्त खेलमा रहेको २ जित र २ बराबरीको नतिजालाई कायम राख्ने लक्ष्यमा हुनेछ।

यद्दपी पोर्चुगलका नियमित कप्तान क्रिस्टियानो रोनाल्डो सेमिफाइनल खेल सकिएलगत्तै टोली छाडेर गएका छन्। आफ्नो जुम्ल्याहा छोराहरु जन्मेपछि टोली व्यवस्थापनले उनलाई बिदा दिएको हो। रोनाल्डोले मेक्सिको विरुद्धको खेलमा सहभागिता जनाउने छैनन्। यद्दपी पछिल्लो खेल प्रतिबन्धका कारण गुमाएका डिफेन्डर पेपे भने छनोटको लागि योग्य हुनेछन्।

मेक्सिकोले पनि यस खेलका लागि वैकल्पिक खेलाडीहरुलाई मौका दिने बुझिएको छ। गोलरक्षक गिल्लेर्मे ओचोआ, डिफेन्डर हेक्ट मोरेनो, फरवार्ड जाभिएर हर्नान्डेज लगायतका खेलाडीहरुलाई विश्राम दिइने बुझिएको छ।

खेल नेपाली समयानुसार रातको ७:४५ बजे सुरु हुनेछ।