काठमाडौँ (हाम्रो खेलकुदं) – युरोपमा ट्रान्सफर विन्डो चलिरहँदा हल्ला र चर्चाहरु चलिरहन्छन् । क्लबहरु नयाँ खेलाडीलाई भित्राउने प्रयासमा व्यस्त हुन्छन् । खेलाडी पनि नयाँ चुनौती र अवसरको खोजिमा हुन्छन् । केहि क्लबहरुले नयाँ सिजनका लागि खेलाडी लिइसकेका छन् भने केहिको नयाँ खेलाडीसँग जोडिने क्रममा छन् ।

एजेन्सीको सहयोगमा हामीले यस सिजनको ट्रान्सफर विन्डोमा धेरै जसो क्लबको चासोमा रहेका स्ट्राइकरहरुको सुची तयार पारेका छौँ ।

क्रिस्टियानो रोनाल्डो

कर छलीको अभियोगसँगै रोनाल्डो र रियल म्याड्रिडबीचको सम्बन्धमा केहि चिसोपन देखिएको छ । रोनाल्डोले क्लब छाड्ने विकल्पका बारेमा सोच बनाइरहँदा रियलका अध्यक्षले पोर्चुगिज स्टार क्लबमै रहने विश्वास व्यक्त गरेका छन् ।

रोनाल्डो म्यानचेस्टर युनाइटेड र पिएसजीसँग जोडिदै आएका छन् । हालै मात्र जुम्ल्याहा छोराको पिता बनेका रोनाल्डोले भविष्यका बारेमा निर्णय गर्न भने बाँकी छ ।

रोबर्ट लेवानडोस्की

वायर्न म्युनिखका स्ट्राइकर लेवानडोस्की लामो समयदेखि प्रिमियर लिगको क्लबसँग जोडिदै आएका छन् । चेल्सी र म्यानचेस्टर युनाइटेडले लामो समय देखि भित्राउन प्रयास गरेको पोलिस स्ट्राइकरमाथि रियल म्याड्रिडको पनि नजर छ । यद्दपी, गत सिजन ३० गोल गरेका लेवानडोस्कीलाई बायर्नले सजिलै बेच्ने छैन ।

किलियन बाप्पे

यो सिजन १५ गोल र ८ असिस्ट गरेका बाप्पे युरोपको उत्कृष्ट युवा खेलाडी हुन् । रियल म्याड्रिड , आर्सनल, चेल्सी , लिभरपुल लगायतका थुप्रै ठूला क्लबहरु उनको पछि लागेका छन् । मोनाकोसँग बप्पेलाई खरिद गर्न भारी रकम तिरे मात्र सम्भव छ ।

रोमेलु लुकाकु

चेल्सीले सन् २०१४ मा लुकाकुलाई एभर्टनमा बेचेको थियो । उनलाई पुन: क्लबमा लिन ठूलो रकम खर्चिने अनुमान लगाइएको थिएन। तर चेल्सी छाडेपछि लगातार उच्च प्रदर्शन गरेका लुकाकुलाई क्लबमा भित्राउन प्रशिक्षक एन्टोनियो कोन्टे प्रयासरत छन् ।

यो सिजन प्रिमियर लिगमा २५ गोल गरेका लुकाकुलाई किन्न चेल्सीले ८० मिलियन पाउण्डसम्म खर्चिन तयार रहेको अनुमान गरिएको छ ।

अल्भारो मोराटा

रियलमा सिमित मौका पाउँदा पनि मोराटोले हरेक क्षणको सदुपयोग गरेका छन् । गत सिजन १५ गोल गरेका मोराटाले हरेक ८८.७ मिनेटको औसतमा गोल गरेका थिए । तर रियल यो सिजन मोराटालाई बेच्ने प्रयासमा छ । विभिन्न क्लबले उनीमाथी चासो देखाएपनि म्यानचेस्टर युनाईटेड उनलाई भित्राउन समर्पित छ ।