एजेन्सी – गत वर्ष युरोपेली च्याम्पियनसिपको उपाधि जितेको पोर्चुगलले बुधबार हुने  फिफा कन्फेडेरेसन कप अन्तर्गत पहिलो सेमिफाइनल खेलमा चिलीको सामना गर्दैछ। कोपा अमेरिका उपाधि जितेको चिलीलाई पराजित गर्दै पोर्चुगल फाइनल पुग्ने धुनमा हुनेछ।

समूह चरण अन्तर्गतका खेलहरुमा पोर्चुगल अपराजित रहँदै समूह ‘ए’को विजेताको रुपमा सेमीफाइनल प्रवेश गरेको हो। पहिलो खेलमा पोर्चुगलले मेक्सिकोसँग २-२को बराबरी खेलेको थियो भने दोश्रो खेलमा रसियालाई १-०ले पराजित गर्यो। समूहको अन्तिम खेलमा न्युजिल्याण्डलाई ४-०ले पराजित गर्दै पोर्चुगलले दोश्रो चरणमा आफ्नो स्थान पक्का गरेको थियो।

पोर्चुगलका लागि डिफेन्डर राफेल गुर्रेरो प्रतियोगिताको बाँकी खेलमा चोटका कारण उपस्थित हुने छैनन्। खुट्टामा चोट लागेका कारण उनलाई प्रशिक्षकले विश्राम दिने निर्णय गरेका हुन्। पोर्चुगलका लागि डिफेन्डर पेपे समूह चरणमा पाएको २ पहेंलो कार्डका कारण उपलब्ध हुने छैनन्। डिफेन्डर सेड्रिक र मिडफिल्डर बर्नार्डो सिल्भा पनि चोटका कारण सुरुवातदेखि खेल्नेमा शंका रहेको छ।

पोर्चुगलको सम्भावित एघार:

रुइ प्याट्रीसियो (गोलरक्षक)

सेड्रिक – ब्रुनो आल्भेस – जोसे फोन्टे – एलिसेउ

बर्नार्डो सिल्भा – विलियम कार्भाल्हो – जोआओ मोउटिन्हो – रिकार्डो करेज्मा

आन्द्रे सिल्भा – क्रिस्टियानो रोनाल्डो (कप्तान)