एजेन्सी – फिफा कन्फेडेरेसन कप अन्तर्गत शनिबार रातीको खेलमा न्युजिल्याण्डलाई ४-०ले पराजित गर्दै पोर्चुगलले सेमिफाइनलमा स्थान पक्का गरेको छ। समूह ‘ए’को अंक तालिकामा २ जित र १ बराबरीसँगै ७ अंक जोड्दै पोर्चुगल समूह विजेताको रुपमा अर्को चरणमा पुगेको हो।

खेलको ३३औं मिनेटमा कप्तान क्रिस्टियानो रोनाल्डोले पेनाल्टीमार्फत गोल गर्दै टोलीलाई अग्रता दिलाएका थिए। यो रोनाल्डोले सिजनको ३३औं र आफ्नो अन्तर्राष्ट्रिय करियरको ७५औं गोल थियो। त्यसको ५ मिनेट नबित्दै पोर्चुगलले आफ्नो अग्रता दोब्बर पारेको थियो। बर्नार्डो सिल्भाले ३८औं मिनेटमा गोल गर्दै टोलीलाई २-०ले अगाडी बढाएका थिए।

दोश्रो हाफमा न्युजिल्याण्डले केहि राम्रो अवसरहरुको सिर्जना गरेपनि त्यसको फाइदा उठाउन सकेन। पोर्चुगलका प्रशिक्षक फर्नान्डो सान्टोसले रोनाल्डोलाई विश्राम दिन ६७औं मिनेटमा उनलाई परिवर्तन गरेका थिए। पोर्चुगलले काउन्टर अट्याकमार्फत ८०औं मिनेटमा गोल गर्दै आफ्नो जित पक्का गरेको थियो। आन्द्रे सिल्भाले हाफ लाइनमा पाएको बललाई अगाडी बढाउँदै लगेर बक्सभित्रबाट गोल गरेका थिए। रोनाल्डोको स्थानमा मैदान प्रवेश गरेका नानीले इन्ज्युरी समयको पहिलो मिनेटमा उत्कृष्ट गोल गर्दै टोलीलाई ४-०को जित दिलाएका थिए।

जितसँगै पोर्चुगलले समूहको अंक तालिकामा मेक्सिकोलाई पछाडी पारेको छ। समान ७ अंक जोडेको मेक्सिकोको तुलनामा पोर्चुगलको गोलअन्तर राम्रो रहेकोले पोर्चुगल समूह विजेताको रुपमा सेमिफाइनल पुग्ने भएको हो।