एजेन्सी – फिफा कन्फेडेरेसन कप अन्तर्गत शनिबार हुने समूह ‘ए’को अन्तिम लिग खेलमा पोर्चुगलले न्युजिल्याण्डको सामना गर्दैछ। खेलको अघिल्लो दिन पत्रकार सम्मेलनमा बोल्दै प्रशिक्षक फर्नान्डो सान्टोसले आजको खेलमा क्रिस्टियानो रोनाल्डोलाई विश्राम दिने सम्भावना रहेको बताएका छन्।

१ जित र १ बराबरीसहित ४ अंक जोड्दै समूहको दोश्रो स्थानमा रहेको पोर्चुगललाई सेमिफाइनल पुग्न कम्तिमा १ अंकको आवश्यकता रहेको छ। फिफा वरियतामा ९५औं स्थानमा रहेको न्युजिल्याण्डले यसअघी खेलेको दुवै खेलमा पराजय भोगेको छ। तर पोर्चुगलका प्रशिक्षक सान्टोसले न्युजिल्याण्डलाई कमजोर ठान्ने गल्ति आफ्नो टोलीले नगर्ने प्रष्ट्याए। ‘न्युजिल्याण्डले मेक्सिकोसँग निकै राम्रो प्रदर्शन गरेको थियो। मौकाको फाइदा उठाएको भए नतिजा अर्कै आउन सक्थ्यो। हामी उनीहरुको क्षमताको बारेमा सचेत छौँ।’

प्रशिक्षक सान्टोसले यस खेलमा केहि खेलाडीहरुलाई विश्राम दिने जानकारी दिए। ‘हामीले ७२ घण्टाभन्दा कम विश्राम पाएका छौँ। यस्तो अवस्थामा खेलाडीहरुलाई पक्कै सजिलो हुँदैन। त्यसैले मैले सोचेर सबैलाई विश्राम दिनुपर्ने हुन्छ।’

उनले सबैजना क्रिस्टियानोको खेल हेर्न आतुर भएपनि टोलीको चाहअनुसार निर्णय लिनुपर्ने भएकाले रोनाल्डो विश्राम गर्न सक्ने बताए। ‘सबैजना रोनाल्डोको खेल हेर्न आतुर छन्, म आफैं पनि उनको खेल हेर्न चाहन्छु। तर उनलाई खेलाउने नखेलाउने बारेमा अझै निर्णय लिन सकेको छैन। टोलीमा परिवर्तन अवश्य हुनेछ।’

पोर्चुगलका लागि ७४औं गोल गरेका रोनाल्डोले राष्ट्रिय टोलीका लागि १ सय ४१ खेल खेलिसकेका छन्।