एजेन्सी – रसियामा जारि फिफा कन्फेडेरेसन कप अन्तर्गत सोमबार भएको खेलमा जर्मनीले अष्ट्रेलियालाई ३-२ले पराजित गर्दै समूह ‘बी’को अंक तालिकामा महत्तपूर्ण ३ अंक जोडेको छ।

खेलको पाँचौ मिनेटमा लार्स स्टीन्डलको गोलमा अग्रता लिएको जर्मनीले ४१औं मिनेटमा बराबरी गोल खाएको थियो। टम रगीचले अष्ट्रेलियाका लागि बराबरी गोल फर्काएका थिए। खेलको मध्यान्तर नजिकिदै गर्दा अष्ट्रेलियाका मास्सिमो लुओंगोले बक्सभित्र फल हानेपछि जर्मनीले पेनाल्टी पाएको थियो। उक्त पेनाल्टीलाई कप्तान जुलियन ड्रयाक्स्लरले गोलमा परिणत गर्दै जर्मनीलाई खेलमा पुन: अग्रता दिलाएका थिए।

दोश्रो हाफ सुरु भएको ३ मिनेट नबित्दै लियोन गोरेट्जकाले गोल गर्दै जर्मनीको अग्रता दोब्बर पारेका थिए। तर पहिलो हाफको तुलनामा दोश्रो हाफमा केहि सुधारिएको प्रदर्शन गरेको अष्ट्रेलियाले खेलमा फर्कने लक्षण देखायो। ५८औं मिनेटमा टमी ज्युरीचले गोल गर्दै खेललाई ३-२को स्थितिमा पुर्याएका थिए। खेलको ७५औं मिनेटमा जर्मनीका टिमो वेर्नरले हानेको प्रहार पोष्टमा लगेर फर्किएपछि जर्मनीले अग्रता बढाउने मौका गुमाएको थियो।

आइतबार भएको समूहको पहिलो खेलमा चिलीले क्यामरुनलाई २-०ले पराजित गरेको थियो। चिली समुहको शीर्ष स्थानमा छ भने जर्मनी दोश्रो स्थानमा रहेको छ।