एजेन्सी – बार्सिलोनाका स्टार फरवार्डद्वय लिओनेल मेस्सी र लुइस सुआरेज हाल आफ्नो छुट्टि मनाउन स्पेनको इबिजामा रहेका छन्। बार्सिलोनाका पूर्व खेलाडी सेस फब्रिगास पनि छुट्टिमा मेस्सी र सुआरेजसँगै घुम्दै छन्।

आ-आफ्नो परिवारसँग इबिजाको बिचमा रमाउंदै गरेका खेलाडीहरु यसै महिनाको अन्त्यमा लिओनेल मेस्सीको विवाहमा सरिक हुँदैछन्। मेस्सीले प्रेमिका एन्टोनेल्ला रोक्कुज्जोसँग जुन ३०को दिन विवाह गर्ने भएका छन्। विवाह अघि छुट्टिमा मेस्सीसँग रोक्कुज्जो र उनीहरुको २ सन्तान पनि रहेका छन्।

यसैक्रममा छुट्टीमा रहेका खेलाडीहरुले इबिजाको क्लब रेष्टुरेन्ट कबारेटनामक रेष्टुरेन्टमा खाएको खानाको बिल इन्टरनेटमा भाइरल भएको छ। कुल ३७ हजार ३ सय ३० युरो उठेको बिलमा ६ हजार ४ सय ७८ युरो कर जोडिएको छ।

२७ पिज्जाको ६ सय २१ युरो, ७ बर्गरको १ सय १२ युरो, ४ फलफुल बास्केटको १ हजार युरो रहेको छ भने सबैभन्दा बढी ४१ ओटा स्याम्पेनको २४ हजार ६ सय युरो तिरेका छन्। उक्त खानाको बिल मेस्सी आफैंले तिरेका थिए।

सुआरेज, मेस्सी र फब्रिगास निकै मिल्ने साथिहरु हुन्। बार्सिलोना छाडेपनि फब्रिगासको खेलाडीहरुसँग राम्रो सम्बन्ध रहँदै आएको छ। मेस्सीले आफ्नो विवाहमा क्लबका केहि पूर्वखेलाडीहरुलाई पनि निम्तो दिएका छन्।