काठमाडौं (हाम्रो खेलकुद) – राष्ट्रिय फुटबल टोलीका गोलरक्षक किरण चेम्जोङ व्यवसयिक क्लब फुटबल करियरलाई निरन्तरता दिन माल्दिभ्स प्रस्थान गरेका छन्।  राष्ट्रिय टोलीको जिम्मेवारी निर्वाह गर्न २ साता अघि नेपाल आएका किरणले नेपालले खेलेको दुवै खेलमा राम्रो प्रदर्शन गरे। यमनविरुद्धको खेलमा किरण म्यान अफ द म्याच घोषित भएका थिए।

गत बर्ष पुसमा माल्दिभ्सको माथिल्लो श्रेणीको क्लब टिसी स्पोर्टसमा आबद्ध भएका किरणले त्यसयता उक्त क्लबबाट सबै खेल खेलेका छन्। लिगको ८ खेलपछि किरणको टोली टिसी स्पोर्टसको १४ अंक छ । शीर्षस्थानमा रहेको माजियाको २१ अंक छ । लिग अन्तर्गत किरणको टिसी स्पोर्ट्सले मंगलबार न्यु रेडियन्टको सामना गर्दैछ।

किरण कतार एअरलाइन्सको क्यु आर ६४७ विमान चढेर दोहा हुँदै माल्दिभ्स पुग्नेछन्।

माल्दिभ्समा पनि किरणले उच्च प्रदर्शन गर्दै आएका छन् । उनले सिजनको पहिलो नकआउट प्रतियोगितामा नै टोलीलाई उपाधि दिलाउन महत्वपूर्ण भूमिका निर्वाह गरेका थिए । बंगलादेशमा भएको शेख कमल कप नकआउट प्रतियोगिताको उपाधि उनको टोली टिसी स्पोर्टसले जितेको थियो । उनले टिसी स्पोर्टसबाट खेलेको त्यो पहिलो प्रतियोगिता थियो । त्यो प्रतियोगितामा किरणको पूर्व क्लब लक्ष्मी हुन्डाई मनाङ मस्र्याङ्दीलाई हराएको थियो । मनाङविरुद्धको सेमिफाइनलमा किरण म्यान अफ दी म्याच चुनिएका थिए ।