पेरिस(एजेन्सी) – मोनाकोका युवा स्ट्राइकर किलीयन बाप्पेले आफुलाई रियल म्याड्रिडले करिब ४ बर्ष अघि देखि म्याड्रिडमा बोलाएको खुलासा गरेका छन्। १८ वर्षीय बाप्पे यो सिजन पनि रियल म्याड्रिडको नजरमा छन् ।

मोनाकोसँग रहेर गत सिजन २४ गोल गर्दै फ्रान्सको लिग वन जिताउन मद्दत गरेका बाप्पेले रियलले आफु प्रति रुचि राखेको बताए। “म १४ बर्ष हुँदा रियलसँग खेल्ने प्रस्ताव पहिलो पटक आएको थियो। तर त्यस समयमा रियल जानु ठिक थिएन र म मेरो त्यस निर्णयप्रति खुसि छु।”, इङ्ल्याण्डविरुद्ध फ्रान्सको मैत्रीपूर्ण जितपछि पेरिसमा बाप्पेले पत्रकारहरुसँग भने ।

रियलको नजरमा परेका बाप्पेप्रति इङ्लिस क्लबहरुको पनि चासो छ । म्यानचेस्टर युनाइटेड, आर्सनल र लिभरपुल लगायतका क्लबहरु बाप्पेलाई भित्र्याउन कसरत गरिरहेका छन् ।

युरोपका ठूला क्लबलाई आकर्षण गरेका बाप्पेले भने आफ्नो भविष्यको बारेमा निर्णय गरिसकेका छैनन्। “मैले मेरो परिवारसँग सल्लाह गर्न बाकी छ । म अहीले मोनाकोसँग सम्झौतामा छु त्यसैले केहि भन्न सक्ने अवस्थामा छैन” , उनले थपे।

फ्रान्सको राष्ट्रिय टोलीका सदस्य रहेका बाप्पेले यसअघि रियल म्याड्रिड आफ्नो सपनाको क्लब रहेको बताउँदै आएका थिए। मोनाकोले भने विश्व कीर्तिमानी रकमको प्रस्ताव आएमात्र बाप्पेलै बिक्रि गर्ने बताउँदै आएको छ। बाप्पेलै फ्रान्सेली दिग्गज खेलाडी थिएरी हेनरीसंग तुलना गरिंदै आएको छ।