काठमाडौँ (हाम्रो खेलकुद) – एएफसी एसियन कप २०१९को छनोट चरण अन्तर्गत आज हुने खेलमा नेपालले यमनको सामना गर्दैछ। हलचोक स्थित सशस्त्र प्रहरी बलको रंगशालामा हुने खेल दिनको ३ बजे सुरु हुँदैछ।

छनोट अन्तर्गत समूह चरणको पहिलो खेलमा नेपाल फिलिपिन्स सँग ४-१ले पराजित भएको थियो। फिलिपिन्सको मनिला सहरमा भएको उक्त खेलमा नेपालका विक्रम लामाले रातो कार्ड खाएका थिए भने रबिन श्रेष्ठ घाइते भएका थिए। दुवै खेलाडी आजको खेलमा उपस्थित रहने छैनन्। नेपालले यस खेलको तयारीका लागि भारतसँग गत साता मैत्रीपूर्ण खेल खेलेको थियो। मुम्बईको अँधेरी स्पोर्ट्स कम्प्लेक्समा खेलिएको खेल नेपालले २-०ले गुमाएको थियो। उक्त खेलमा रातो कार्ड पाएका बिराज महर्जन भने आजको खेलमा उपलब्ध हुनेछन्।

यमनले छनोट चरणको पहिलो खेलमा ताजिकिस्तानलाई २-१ले पराजित गर्दै सुखद सुरुवात गरेको थियो। १ गोलले पछि पारेको स्थितिलाई उल्टाउदै यमन खेलमा विजयी रहेको थियो। यमनले आफ्नो घरेलु मैदान उपलब्ध नरहेका कारण सबै खेल कतारको दोहामा खेल्दै आएको छ। यस खेलका लागि यमनका ५ खेलाडी अनुपस्थित रहेका छन्। विदेशी लिगमा खेल्ने भएकाले क्लबले समयमै छाड्न नमानेपछि प्रशिक्षक मेब्राटुले नेपालविरूद्ध तुलनात्मक रुपमा केहि कमजोर खेलाडी उतार्नेछन्।

समूहको अंक तालिकामा नेपाल अन्तिम स्थानमा छ भने यमन दोश्रो स्थानमा छ। फिलिपिन्स शीर्ष स्थानमा रहेको छ। समूहका शीर्ष २ टोली एसियन कपको लागि छनोट हुने प्रावधान रहेको छ। सन् २०१९को एसियन कप दुबईमा हुने कार्यक्रम रहेको छ।

खेलको प्रत्यक्ष प्रसारण हाम्रो खेलकुद लाइभ र एपीवान एचडी मार्फत हेर्न सकिनेछ।