अर्जुन कार्की
बागलुङ– चिल्ड्रेन लाइफ स्पोर्टस् क्लब र फ्युचर स्पोर्टस् क्लब बागलुङ जिल्ला लिग फुटबलको उपाधिको लागि भिड्ने भएका छन् । दोस्रो सेमिफाइनलमा रुद्रेपिपल युवा क्लबलाई ३–० ले पराजित गर्दै फ्युचर स्पोर्टस् फाइनलमा प्रवेश गरेको छ ।

आइतबार फ्युचर स्पोर्टस्ले पहिलो हाफमा २–० ले अग्रता लिदा वर्षाको कारण अवरुद्ध भएको खेल सोमबार दोस्रो हाफदेखि खेलाइएको थियो । दोस्रो हाफमा पनि फ्युचर हावि भएको खेलको ३२ मिनेटमा पूर्ण बहादुर गुरुङले गोल गरे । आइतबार प्रमल थापाले २ गोल गरेका थिए । फ्यचर समूह ‘ख’को विजेता बन्दै सेमिफाइनलमा प्रवेश गरेको हो ।

पहिलो सेमिफाइनल खेलबाट चिल्ड्रेन लाईफ स्पोर्टस् आइतबार नै फाइनल पुगेको थियो । अखिल नेपाल फुटबल संघ (एन्फा)को बार्षिक कार्यक्रम अनुसार बागलुङ जिल्ला फुटबल संघले आयोजना गरेको प्रतियोगितामा लिग विजेताले उपाधिसहित ५० हजार र दोस्रो हुने टोलीले २५ हजार रुपैयाँ प्राप्त गर्नेछन् ।

त्यस्तै प्रतियोगितामा सर्वोत्कृष्ट खेलाडी र अनुशासित टिमले समान २ हजार रुपैयाँ प्राप्त गर्नेछन् । उत्कृष्ट गोलकिपर, रक्षक, मिडफिल्ड, स्ट्राइकर र उच्च गोलकर्ताले समान १ हजार रुपैयाँ प्राप्त गर्ने संघले जनाएको छ ।

फाइनल खेल मंगलबार दिउँसो बाङ्गेचौर खेल मैदानमा हुने जिल्ला फुटबल संघ बागलुङका महासचिव जय राजभण्डारीले जानकारी दिए । फाइनल खेल सोमबार नै गरिने भनिएतापनि प्राविधिक कारणले खेल सर्न पुगेको महासचिव राजभण्डारीले बताए ।