काठमाडौँ (हाम्रो खेलकुद) – एएफसी एसियन कप २०१९को छनोट चरण अन्तर्गत समूहको दोश्रो खेल खेल्न यमनको राष्ट्रिय फुटबल टोली आज नेपाल आइपुगेको छ। २९ सदस्यीय यमनको टोलीले भोलि औपचारिक प्रशिक्षण गर्ने कार्यक्रम रहेको छ। 

नेपाल आइपुगेपछि यमनका प्रशिक्षक अब्राहम मेब्राटुले यमन खेल जित्नका लागि नेपाल आएको बताएका छन्। “म यसअघि पनि यू-२२ टोली लिएर नेपाल आएको थिएँ र पछिल्लो पटक नेपाल र यमन खेल्दा पनि मैले नेपालको खेल हेरेको छु। हामीले यस खेलमा जित हात पार्नेमा म विश्वस्त छु।”

मेब्राटूले यमनमा पनि लिग नभएका कारण खेलाडी छनोटमा केहि समस्या रहेको बताए। “यमनमा विविध कारणले गर्दा सन २०१४ देखि लिग फुटबल हुन सकेको छैन। यसकारणले खेलाडी छनोट गर्न त समस्या छ नै, टोलीमा भएका खेलाडीमा पनि खेल अनुभव कम रहेको छ। हामीले इजिप्टका केहि क्लबसँग खेल त खेलेका छौँ तर अन्तर्राष्ट्रिय स्तरमा त्यतिले पुग्दैन।”

रमदानका कारण केहि खेलाडी वर्तमा रहेकाले केहि कठिनाई हुने उनले स्वीकारे। “हाम्रा केहि खेलाडी रमदानको वर्त लिएर बसेका छन्। खेल दिउँसोको समयमा हुने भएकाले खेलाडीहरुलाई केहि कठिनाई हुन सक्छ।  तर हामी पहिलानै यसबारे जानकार रहेकाले त्यति ठुलो समस्या हुँदैन।”

नेपालले जेठ ३० गते मंगलबार एपीएफ रंगशाला, हल्चोकमा यमनको सामना गर्दैछ।