कार्तिक १७, २०७२- राष्ट्रिय खेलकुद परिषदले म्याच फिक्सिङ र उमेर समुहको जिम्मेवारीलाई लिएर अखिल नेपाल फुटबल संघ (एन्फा)संग स्पष्टिकरण माग गरेको छ ।

राष्ट्रिय खेलकुद परिषदको सदस्यसचिव स्तरीय बैठकले सात दिनभित्र लिखित जवाफ पठाउन एन्फालाई तीन बुँदे स्पष्टिकरण सोधेको छ ।

राखेपले म्याच फिक्सिङमा स्थापित नै खेलाडी संलग्न भएको अवस्थामा के कसरी यस्तो अवस्था आएको हो, कस–कसको जिम्मेवारी छ, आगामी दिनमा उक्त घटना दोहोरिन नदिन संघको के तयारी छ भन्नेजस्तो प्रश्नावली एन्फा समक्ष पठाएको छ|

साथै, यस घटनाबारे एन्फाले छानबिन गरेको छ/छैन र यस घटनाबारे एन्फाको धारणा पनि व्यक्त गर्न एन्फालाई अनुरोध गरिएको छ| एएफसीले नेपाली यू– १६ फुटबल टोलीलाई प्रतिबन्ध गर्दा मिहिनेत, परिश्रम, राष्ट्रको प्रतिष्ठामा आँच आएको तथा खेलाडीको मनोबल घटेको भन्दै कसबाट कमजोरी भएको प्रष्ट पार्न र सत्य तथ्य बिवरण पेश गर्न एन्फालाई अनुरोध गरेको छ|

यसैगरी पुनरावेदनले उपाध्यक्ष कर्मा छिरिङ शेर्पा, विजयनारायण मानन्धर र पंकज नेम्वाङलाई साधारणसभामा सहभागी गराउन आदेश दिएकोमा त्यस आदेशको बेवास्ता गरेकोबारे पनि प्रष्टिकरण मागेको छ । सो बारे राखेपले एन्फालाई करिब तिन हप्ता अघिनै स्पष्टिकरण माग गरेको थियो । राखेपले यसअघि सोधेको प्रष्टिकरणमा एन्फाले जवाफ दिएको थिएन तर साधारणसभा भने स्थगित हुन पुगेको थियो|