अर्जुन कार्की
बागलुङ– फ्युचर स्पोर्टस् क्लब र रस आवर फुटसल बागलुङमा जारी जिल्ला लिग फुटबल प्रतियोगिताको सेमिफाइनलमा पुगेका छन् । समुह ‘ख’बाट फ्युचर स्पोर्टस् विजेता र रस आवर उपविजेताका रुपमा अन्तिम चारमा पुगेका हुन् । जिल्लाको बाङ्गेचौर खेलमैदानमा शनिबार भएको पहिलो खेलमा फ्युचर स्पोर्टस् र रस आवरले गोलरहित बराबरी खेलेपछि दुवै टोली सेमिफाइनल पुग्न सफल भएका हुन् ।

समुह चरणको खेलमा ३ खेलबाट फ्युचर स्पोर्टस् क्लबले ७ र रस आवर फुटसलले ५ अंक जोड्दै अघिल्लो चरण पुगेका हुन् । शनिबार नै भएको समुह ‘ख’को मुलपानी खेलकुद विकास समितिले पावर फिटनेस क्लबलाई २–० ले हरायो । दुवै गोल दोस्रो हाफ भएको थियो । सेमिफाइनल पुग्नका लागि पावर फिटनेसलाई जितको आवश्यकता थियो ।

अखिल नेपाल फुटबल संघ (एन्फा) को बार्षिक कार्यक्रम अनुसार बागलुङ जिल्ला फुटबल संघले आयोजना गरेको प्रतियोगितामा लिग विजेताले उपाधिसहित ५० हजार र दोस्रो हुने टोलीले २५ हजार रुपैयाँ प्राप्त गर्नेछन् । त्यस्तै प्रतियोगितामा सर्वोत्कृष्ट खेलाडी र अनुशासित टिमले समान २ हजार रुपैयाँ प्राप्त गर्नेछन् । उत्कृष्ट गोलकिपर, रक्षक, मिडफिल्ड, स्ट्राइकर र उच्च गोलकर्ताले समान १ हजार रुपैयाँ प्राप्त गर्ने संघले जनाएको छ ।

आइतबार पहिलो सेमिफाइनल समुह ‘क’को विजेता चिल्ड्रेन लाईफ स्पोर्टस् क्लब र समुह ‘ख’को उपविजेता रस आवर तथा दोस्रो खेल समुह ‘ख’को विजेता फ्युचर स्पोर्टस् र समुह ‘क’को उपविजेता रुद्रेपिपल युवा क्लब विच हुने जिल्ला फुटबल संघका महासचिव जय राजभण्डारीले जानकारी दिए ।