काठमाडौं (हाम्रो खेलकुद) – एएफसी एसियन कप छनोट अन्र्तगत घरेलु मैदानमा मंगलबार यमनविरुद्धको खेलको सम्पूर्ण टिकट अनलाइनबाट बित्री हुने अखिल नेपाल फुटबल संघ (एन्फा)ले जनाएको छ ।

अनलाइन टिकटको जिम्मा इ–सेवाले लिएको एन्फाले मंगलबार जनाकारी गरायो । एन्फाले यमनविरुद्धको खेलका लागि जम्मा सात सय टिकट बेच्ने यसअघि नै बताएको थियो । टिकटको मुल्य १ हजार तोकिएको छ । टिकट जेठ २७ गते शनिबार बिहान १० बजेबाट बिक्री गरिनेछ । एक जना दर्शकले बढीमा दुई टिकट मात्र किन्न पाउने प्रावधान राखिएको इ–सेवाले जनाएको छ ।

टिकट किन्ने प्रक्रिया बारे जान्न यहाँ थिच्नुहोस

यसैबीच एन्फाले यमनको टोली २८ गते आइतबार र म्याच अफिसियल र रेफ्रीहरु शनिबार काठमाडौं आइपुग्ने बताएको छ । नेपाल र यमनबीचको खेल यही मंगलबार हल्चोकस्थित नेपाल एपिएफ क्लबको खेल मैदानमा दिउसो तीनबजेपछि शुरु हुनेछ ।

टिकटिङको लागि एन्फाले इ सेवासँग दुई वर्षको सम्झौता भएको बताए । सम्झौता अनुसार इ–सेवाले लिग लगायत विभिन्न राष्ट्रिय तथा अन्तर्राष्ट्रिय प्रतियोगिताको टिकटको जिम्मेवारी पनि पाएको छ । इ–सेवाको प्रमुख कार्यक्र अधिकृत रोशन लामिछानेले एन्फासँग इ–सेवा जोडिन पाउदा खुशी लागेको बताए ।

‘यसअघि हामी क्रिकेटसँग जोडिएका थियौं । अब फुटबलसँग पनि जोडिएको छ ।’ लामिछानेले भने, ‘कमिसन बेसिसमा हामी एन्फासँग जोडिएका हौं । अनलाइनमार्फत टिकट बिक्री हुदा ब्ल्याकमा बेचिने रिस्क कम हुने हामीले विश्वास लिएका छौं ।’ इसेवाले टिकट बिक्रिको कुल ५ प्रतिशत आफ्नो भागमा राख्नेछ, जसमा टिकट बिक्रि गर्ने सिस्टमदेखि सम्पूर्ण प्रक्रियामा लाग्ने खर्च समावेश हुनेछ।

एएफसी एसियन कपको छनोटको पहिलो खेलमा नेपाल फिलिपिन्ससँग ४–१ ले पराजित भएको थियो भने यमनले ताजिकिस्तानलाई २–१ ले पराजित गरेको थियो ।

टिकटको नमुना